आधारभूमि संवाददाता
काठमाडौँ, १७ असार
सामान्यतया कक्षा १२ को अन्तिम परीक्षा बैशाख महिनामा हुने गरेको थियो । तर, कोरोना महामारीका कारण दुई वर्ष यता कुनै पनि परीक्षा तोकिएको समयमा हुन सकेको छैन ।
कोरोना महामारीले सबै क्षेत्रलाई उत्तिकै असर गरेपनि शैक्षिक क्षेत्रलाई भने ध्वस्त नै बनाएको छ । अझ शिक्षा मन्त्रालय लगायतका सरोकारवाला निकायहरु विद्यार्थीको भविष्यलाई लिएर गम्भिर नबन्दा उनीहरुको शैक्षिक सत्र नै अस्त व्यस्त बनेको छ ।
कक्षा १२ को अध्ययन सकाएर उच्च शिक्षा हासिल गर्न खोजेका विद्यार्थीहरु अहिले परीक्षाको विषयलाई लिएर चिन्तित बनेका छन् साथै यसका कारणले अनावश्यक तनाव बढेको विद्यार्थीहरु बताउँछन् ।
यस वर्ष कक्षा १२ को परिक्षा कहिले हुने भन्ने बारे असारको तेस्रो सातासम्म पनि टुंगो लागेको छैन । यता, राष्ट्रिय परिक्षा बोर्डले भने विद्यार्थीहरु अनलाईन कक्षामा अभ्यस्त नभएको, सबै विद्यार्थीसम्म ईन्टरनेटको पहुँच नभएको र विद्युतको प्रवाह पनि सबै विद्यालयमा नभएकोले तत्काल अनलाईन माध्यमबाट परीक्षा लिन नसकिने भएकाले गत बर्षकै शैलिमा परिक्षा लिने तयारी भईरहेको राष्ट्रिय परिक्षा बोर्डका अध्यक्ष चन्द्रमणि पौडेलले जानकारी दिए ।
गत बर्ष राष्ट्रिय परिक्षा बोर्डले कक्षा १२ का विद्याथीृका लागि अध्ययन गरिरहेको विद्यालयलाई नै परीक्षा केन्द्र कायम गरी ४० पुर्णाकको लिखित परीक्षा लिएको थियो । तर यस वर्ष परीक्षाको टुंगो अझै लागि नसकेकोले विश्वविद्यालय तहको भर्ना प्रक्रियामा समेत प्रभावित भइरहेको छ । कोरोना भाइरस संक्रमणको दर अहिले केही घटेको छ ।
