आधारभूमि संवाददाता
काठमाडौं, जेठ २६
फिफा विश्वकप २०२२ कतार अन्तर्गत दक्षिण अमेरिका छनोटमा अर्जेन्टिना बराबरीमा रोकिएको छ।
बुधबार बिहान भएको खेलमा अर्जेन्टिनाले कोलम्बियासँग २–२ गोलको बराबरी खेलेको हो ।
खेलमा अर्जेन्टिनाको लागि क्रिस्टियन रोमेरो र लेअन्द्रो परेडेसले एक एक गोल गरे भने कोलम्बियाको लागि लुइस फर्नान्डो र मिगुएल बोर्जाले एक एक गोल गरे ।
खेलमा पहिलो अग्रता भने अर्जेन्टिनाले लिएको थियो। खेलको तेस्रो मिनेटमा क्रिस्टियन रोमेरोले गोल गर्दे टोलीलाई अग्रता दिलाएका थिए।
खेलको आठौं मिनेटमा लेअन्द्रो परेडेसले गोल गर्दे टोलीको अग्रता दोब्बर बनाए ।
दोस्रो हाफको ५१ औं मिनेटमा कोलम्बियाका लुइस फर्नान्डोले गोल गर्दै खेल २-१ को स्थितिमा ल्याए ।
त्यसपछि इन्जुरी समयमा मिगुएल बोर्जाले गोल गर्दै खेल बराबरीमा फर्काए र टोलीलाई हारबाट जोगाए ।
बराबरीसँगै अर्जेन्टिनाले ६ खेलबाट १२ अंक जोडेको छ र दोस्रो स्थानमा छ।कोलम्बियाको ६ खेलबाट ८ अंक छ र पाँचौं स्थानमा छ ।शीर्ष स्थानको ब्राजिलको ६ खेलबाट १८ अंक छ ।
