आधारभूमि संवाददाता
काठमाडौ, चैत २९
फ्रेन्च लिग वान फुटबलमा पेरिस सेन्ट जर्मेन (पीएसजी) ले फराकिलो जित निकालेको छ । शनिबार राति भएको खेलमा पीएसजीले स्ट्रासबर्गलाई ४-१ गोलले पराजित गरेको हो ।
पीएसजीलाई जित दिलाउन केलियन एमबाप्पे, पाब्लो सरबिया,मोइज केन र लीन्ड्रो परेडेसले एक-एक गोल गरे । स्ट्रासबर्गको डिओन मोइस साहिले एक गोल फर्काए ।
खेलको १६ औँ मिनेटमा केलियन एमबाप्पेले गोल गर्दै पीएसजीलाई सुरुवाती अग्रता दिलाएका थिए।२७ औँ मिनेटमा पाब्लो सरबियाले गोल गर्दै टोलीको अग्रता दोब्बर पारे ।
खेलको ४५ औं मिनेटमा मोइस किनले गोल गर्दै टोलीलाई ३-० ले अघि बढाए।
दोस्रो हाफको ६३ औं मिनेटमा स्ट्रासबर्गका डिओन मोइस साहिले गोल गर्दै ३-१ को स्थितिमा ल्याए ।
त्यसपछि खेलको ७९ औं मिनेटमा पीएसजीका लीन्ड्रो परेडेसले गोल गर्दै टोलीलाई ४-१ को जित दिलाए ।
जितसँगै पीएसजीले ३२ खेलबाट ६६ अंक जोडेको छ र दोस्रो स्थानमा छ ।पराजित स्ट्रासबर्गको ३२ खेलबाट ३६ अंक छ र १४ औं स्थानमा छ ।
