आधारभूमि संवाददाता
काठमाडौं, चैत २४
इंग्लिस प्रिमियर लिग फुटबलमा एभर्टन क्रिस्टल प्यालेससँग बराबरीमा रोकिएको छ । सोमबार राति भएको खेलमा एभर्टनलाई क्रिस्टल प्यालेसले १-१ गोलको बराबरीमा रोकेको हो ।
खेलमा एभर्टनको लागि जेम्स रोड्रीगेजले एक गोल गरे भने क्रिस्टल प्यालेसको लागि मिचि बत्सुआईले एक गोल गरेका थिए।
खेलमा पहिलो अग्रता एभर्टनलेनै लिएको थियो । खेलको ५६ औं मिनेटमा जेम्स रोड्रीगेजले गोल गर्दै एभर्टनलाई अग्रता दिलाएका थिए। तर,खेलको ८६ औँ मिनेटमा क्रिस्टल प्यालेसका मिचि बत्सुआईले गोल गर्दै खेल बराबरीमा फर्काए र टोलीलाई हारबाट जोगाए ।
बराबरी सँगै एभर्टनले २९ खेलबाट ४७ अंक जोडेको छ र आठौं स्थानमा छ। क्रिस्टल प्यालेसको ३० खेलबाट ३८ अंक छ र १२ औं स्थानमा छ ।
