आधारभूमि संवाददाता
काठमाडौं, चैत ११
नेपाल टेलिकमले इन्टरनेट बिनानै चल्ने वालेट सञ्चालनमा ल्याउन लागेको छ । अहिले सञ्चालनमा रहेका वालेटहरुलाई इन्टरनेट मात्रै होइन, माबोइल फोन पनि स्मार्टफोन पनि चाहिन्छ। तर टेलिकमले ल्याउन लागेको वालेट भने कि प्याड मोबाइलमा नै चलाउन सकिन्छ ।
अहिले इ सेवा तथा खल्ती लगायत अन्य डिजिटल वालेट सञ्चालनमा छ्न् । तर तिनको सञ्चालनका लागि इन्टरनेटको आवश्यकता पर्छ । नेपाल टेलिकमले भने इन्टरनेट बिनानै चलाउन सकिने वालेटको सञ्चालनमा ल्याउने तयारी गर्दैछ ।
यो सेवा सञ्चालनका लागि नेपाल राष्ट्र बैंकले कम्पनीलाई चैत ३ मा अनुमति दिइसकेको छ । कम्पनीमा नेपाल टेलिकमको ६२ र राष्ट्रिय वाणिज्य बैंकको ३८ प्रतिशत लगानी छ । यो नेपाल टेलिकमको सहायक कम्पनी भएपनि सेवा भने एनसेलका ग्राहकलाई समेत दिने कम्पनीको तयारी छ ।वालेट सञ्चालनमा आएमा यसले डिजिटल नेपालको लागि एक खुड्किलो अघि बढाउनेछ ।
नेपाल टेलिकम र राष्ट्रिय वाणिज्य बैंकको लगानी रहेको नेपाल डिजिटल पेमेन्ट्स कम्पनीले वालेटको कारोबार गर्न गत चैतमा नै नेपाल राष्ट्र बैंकबाट अनुमति पाइसकेको छ ।
अहिलेका वालेट सञ्चालनका लागि मोबाइल पनि स्मार्ट खालको हुनुपर्छ । सामान्य मोबाइलबाट ती वालेटको सेवा सम्भव हुँदैन ।वैशाखदेखि प्रयोगमा ल्याउन लागिएको वालेटका लागि भने इन्टरनेट चाहिंदैन । सामान्य खालको मोबाइलबाटै पानी र बिजुलीको महशुल तथा कर तिर्न मिल्ने व्यवस्था गर्न लागिएको हो । त्यसका लागि मोबाइल फोन सेवाको नेटवर्क चाहिन्छ ।
अहिले एउटा मोबाइबाट अर्काेमा जसरी ब्यालेन्स पठाइन्छ, त्यसैगरि युएसएसडी कोडको सहायतामा बिल तिर्न सकिनेछ । कम्पनीले टेलिकमका साथै एनसेलका प्रयोगकर्ताले समेत सेवा लिन सक्ने व्यवस्था गर्न लागेको छ
कम्पनीले सुरु गर्न लागेको वालेटमा रिचार्ज कार्डबाट भने रकम राख्न मिल्दैन । अर्थात फोन सेवाका लागि ब्यालेन्स गरेको रकम कर तिर्न र बिल भुक्तानीमा प्रयोग गर्न मिल्दैन । वालेटमा रकम राख्ने प्रयोजनका लागि कम्पनीले देशैभर एजेन्ट तोक्दैछ । बृद्धभत्ता लगायत सामाजिक सुरक्षा भत्ता सरकारी खाताबाट सिधै सम्बन्धित व्यक्तिको वालेटमा जम्मा गराउने कम्पनीको योजना छ ।
