आधारभूमि संवाददाता
काठमाडौँ,२७ फागुन
इंग्लिस प्रिमियर लिग फुटबलमा शीर्ष स्थानको म्यानचेस्टर सिटीले १४ अंकको अग्रता बनाएको छ । बुधबार राति घरेलु मैदानमा भएको खेलमा सिटीले साउथेम्प्टनलाई ५-२ गोलले पराजित गरेको हो ।
सिटीलाई जित दिलाउन केविन डी ब्रुएनले र रियाद महरेजले दुई-दुई गोल गरे भने इल्के गुन्डोगानले एक गोल गरे । साउथेम्प्टनका जेम्स वार्ड-प्रूज र चे एडम्स एक-एक गोल गरे ।
खेलको १५ औं मिनेटमा केविन डी ब्रुएनले गोल गरेपछि सिटीले अग्रता लिएको थियो । २५ औं मिनेटमा साउथेम्प्टनका जेम्स वार्ड-प्रूजले गोल गर्दै खेल बराबरीमा ल्याए ।
खेलको ४० औं मिनेटमा रियाद महरेजले गोल गर्दै सिटीलाई २-१ ले अघि बढाए ।पहिलो हाफको इन्जुरी समयमा इल्के गुन्डोगानले गोल गर्दै सिटीलाई ३-१ ले अघि बढाए ।
दोस्रो हाफको ५५ औं मिनेटमा रियाद महरेजले व्यक्तिगत दोस्रो गोल गर्दै सिटीलाई ४-१ ले अघि बढाए ।लगत्तै ५६ औं मिनेटमा साउथेम्प्टनका चे एडम्सले गोल गर्दै ४-२ को स्थितिमा ल्याए ।
त्यसपछि खेलको ५९ औं मिनेटमा केविन डी ब्रुएनले व्यक्तिगत दोस्रो गोल गर्दै सिटीलाई ५-२ को सानदार जित दिलाए ।
जितसँगै सिटीले २९ खेलबाट ६८ अंक जोडेको छ र शीर्ष स्थानमा १४ अंकको अग्रता बनाएको छ ।पराजित साउथेम्प्टनको २८ खेलबाट ३३ अंक छ र १४ औं स्थानमा छ ।
