आधारभूमि संवाददाता
काठमाडौ, फागुुन १५
स्पेनिस ला लिगा फुटबलमा बार्सिलोनाले सहज जित निकालेको छ ।शनिबार सम्पन्न भएको खेलमा बार्सिलोनाले सेभियालाई उसकै घरेलु मैदानमा २-० गोलले पराजित गरेको हो ।
बार्सिलोनालाई जित दिलाउन लियोनल मेस्सी र ओउस्माने डेम्बेलेले एक-एक गोल गरे।
खेलको २९ औं मिनेटमा ओउस्माने डेम्बेलेले गोल गर्दै बार्सिलोनालाई सुरुवाती अग्रता दिलाएका थिए ।
त्यसपछि खेलको ८५ औँ मिनेटमा लियोनल मेस्सीले गोल गर्दै टोलीलाई २-० को जित दिलाए ।
जितसंगै बार्सिलोनाले २५ खेलबाट ५३ अंक जोडेको छ र दोस्रो स्थानमा उक्लिएको छ । शीर्ष स्थानको एट्लेटिको मड्रिडको २३ खेलबाट ५५ अंक छ । पराजित सेभियाको २४ खेलबाट ४८ अंक छ र चौंथो स्थानमा छ ।
