आधारभूमि संवाददाता
काठमाडौँ,माघ २६
बार्सिलोना स्पेनिस ला लिगा फुटबलमा दोस्रो स्थानमा उक्लिएको छ । आइतबार राति भएको खेलमा बार्सिलोनाले रियल बेटिसलाई उसकै मैदानमा ३-२ गोलले पराजित गरेको हो ।
बार्सिलोनालाई जित दिलाउन लियोनल मेस्सी र फ्रान्सिस्को ट्रिन्कोले एक एक गोल गरे ।बार्सिलोनाले एक गोल आत्मघाती गोलको उपहार पाएको थियो ।रियल बेटिसको बोर्जा इग्लेसियास र भेक्टर रुइजले एक एक गोल गरे ।
खेलमा पहिलो अग्रता रियल बेटिसले लिएको थियो । खेलको ३८ औं मिनेटमा बोर्जा इग्लेसियासले गोल गर्दै बेटिसलाई अग्रता दिलाएका थिए ।
दोस्रो हाफको ५९ औं मिनेटमा लियोनल मेस्सीले गोल गर्दै खेल बराबरीमा ल्याए ।६८ औं मिनेटमा रियल बेटिसका भेक्टर रुइजले आत्मघाती गोल गरेपछि बार्सिलोना २-१ ले अघि रह्यो ।
त्यसको सात मिनेटपछि भेक्टर रुइजले गोल गर्दै बेटिसलाई २-२ को बराबरीमा ल्याए ।त्यसपछि खेलको ८७ औं मिनेटमा बार्सिलोनाका फ्रान्सिस्को ट्रिन्कोले गोल गर्दै बार्सिलोनालाई ३-२ को जित दिलाए ।
जितसंगै बार्सिलोनाले २१ खेलबाट ४३ अंक जोडेको छ र दोस्रो स्थानमा उक्लिएको छ । शीर्ष स्थानको एट्लेटिको मड्रिडको १९ खेलबाट ५० अंक छ । पराजित बेटिसको ३० अंक छ र सातौं स्थानमा छ ।
