आधारभूमि संवाददाता
काठमाडौँ, ११ माघ
रियल मड्रिडले स्पेनिस ला लिगा फुटबलमा सानदार जित निकालेको छ ।शनिबार राति भएको खेलमा रियल मड्रिडले आल्भेसलाई ४-१ गोलले पराजित गरेको हो।
रियललाई जित दिलाउन करीम बेंजामाले दुई गोल , केसमिरो र इडेन हजार्डले एक-एक गोल गरे । आल्भेसको जोसिलुले एक गोल फर्काए ।
खेलको १५ औं मिनेटमा केसमिरोले गोल गर्दै रियललाई सुरुवाती अग्रता दिलाएका थिए ।४१ औं मिनेटमा करीम बेंजामाले गोल गर्दै टोलीलाई २-० को अग्रता दिलाए ।पहिलो हाफको इन्जुरी समयमा इडेन हजार्डले गोल गर्दै टोलीलाई ३-० ले अघि बढाए।
दोस्रो हाफको ५९ औँ मिनेटमा आल्भेसको जोसिलुले एक गोल फर्काए ।
त्यसपछि खेलको ७० औं मिनेटमा करीम बेंजामाले व्यक्तिगत दोस्रो गोल गर्दै टोलीलाई ४-१ को शानदार जित दिलाए ।
जितसंगै रियलले १९ खेलबाट ४० अंक जोडेको छ र दोस्रो स्थानमा छ । पराजित आल्भेसको २० खेलबाट १८ अंक छ र १७ औं स्थानमा छ ।रियलले शीर्ष स्थानको एट्लेटिको मड्रिडसंगको दुरी चार अंकमा झारेको छ । एट्लेटिको मड्रिडले रियलले भन्दा दुई खेल कम खेलेको छ ।
