आधारभूमि संवाददाता
काठमाडौँ, २३ कात्तिक
एट्लेटिको मड्रिड स्पेनिस ला लिगा फुटबलको शीर्ष स्थानमा उक्लिएको छ ।शनिबार राति घरेलु मैदानमा भएको खेलमा एट्लेटिको मड्रिडले काडिजलाई ४-० गोल अन्तरले पराजित गर्दै शीर्ष स्थानमा उक्लिएको हो ।
एट्लेटिको मड्रिडलाई जित दिलाउन जोआ फेलिक्सले दुई गोल , मार्कोस लोरेन्टे र लुइस सुआरेजले एक- एक गोल गरे ।एट्लेटिकोले दुई गोल पहिलो हाफमा र दुई गोल दोस्रो हाफमा गरेको हो ।
खेलको ८ औं मिनेटमा जोआ फेलिक्सले गोल गर्दै टोलीलाई अग्रता दिलाएका थिए ।२२ औं मिनेटमा मार्कोस लोरेन्टेले गोल गर्दै टोलीलाई पहिलो हाफमा २-० ले अघि बढाए।
दोस्रो हाफको ५१ औं मिनेटमा लुइस सुआरेजले गोल गर्दै टोलीलाई ३-० को अग्रता दिलाए। त्यसपछि जोआ फेलिक्सले खेलको ९० औं मिनेटमा व्यक्तिगत दोस्रो गोल गर्दै टोलीलाई ४-० को जित दिलाए ।
जितसँगै एट्लेटिको मड्रिडले ७ खेलबाट १७ अंक जोडेको छ र शीर्ष स्थानमा उक्लिएको छ। पराजित काडिजको १४ अंक छ रछैटौं स्थानमा रहेको छ । दोस्रो स्थानको रियल सोसिडाडको ८ खेलबाट १७ अंक छ। तेस्रो स्थानको रियल मड्रिडको ७ खेलबाट १६ अंक छ ।
