आधारभूमि संवाददाता
काठमाडौ, भदौ १६
नेपालमा थप १०६९ जनामा कोरोना सङ्क्रमण पुष्टि भएको छ ।
स्वास्थ्य तथा जनसङ्ख्या मन्त्रालयद्वारा आज यहाँ आयोजित नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले पछिल्लो २४ घण्टामा देशभरिका विभिन्न प्रयोगशालामा १२ हजार ८८ जनाको नमूना परीक्षण गर्दा उक्त सङ्ख्यामा कोरोना सङ्क्रमण पुष्टि भएको जानकारी दिए। यो सँगै सङ्क्रमितको सङ्ख्या ४० हजार ५२९ पुगेको छ ।
त्यस्तै पछिल्लो २४ घण्टामा पीसीआर विधिबाट १२ हजार ८८ जनाको परीक्षण भएको छ । क्वारिन्टिनमा रहेका व्यक्तिहरुको सङ्ख्या ७ हजार ३९० रहेको छ । कोरोना सक्रिय संक्रमितको संख्या १८ हजार १ सय १२ छ। जसमा संस्थागत आइसोलेसनमा १० हजार ८३२ जना रहेका छन् भने होम आइसोलेसनमा ७ हजार २८० जनाको उपचार भइरहेको छ। हालसम्म ७ लाख ५ हजार ५६० को पीसीआर परीक्षण गरिएको छ।
थप ७६८ जना डिस्चार्ज
नेपालमा पछिल्लो २४ घण्टामा ७६८ जनाले कोरोना जितेका छन् । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले पछिल्लो २४ घण्टामा देशभरिका विभिन्न प्रयोगशालाबाट ७६८ जना डिस्चार्ज भएको बताए ।
योसँगै हालसम्म कोरोनामुक्त भई डिस्चार्ज हुनेको कूल सङ्ख्या २२ हजार १७८ पुगेको छ ।
