आधारभूमि संवाददाता
काठमाडौँ, १८ साउन
काठमाडौंमा थप ३१ जनामा कोभिड–१९ का सङ्क्रमित थपिएका छन् । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता प्रा डा जागेश्वर गौतमले पछिल्लो २४ घण्टामा विभिन्न प्रयोगशालामा गरिएको परीक्षणका क्रममा उपत्यकामा ३१ जनाको पिसिआर पोजेटिभ आएको बताए ।
नयाँ संक्रमितमा काठमाडौंका २२, ललितपुरका ८ र भक्तपुरका १ जना रहेको प्रवक्ता गौतमले जानकारी दिए । बिहीबार काठमाडौं उपत्यकामा ४५ संक्रमित थपिएका थिए ।
त्यस्तै पछिल्लो २४ घण्टामा २७ वटा प्रयोगशालामा पीसीआर विधिबाट ८ हजार ८६१ जनाको परीक्षण भएको छ । क्वारिन्टिनमा रहेका व्यक्तिहरुको सङ्ख्या १० हजार ९३४ रहेको छ । कोरोना सक्रिय संक्रमितको संख्या ५ हजार ६ सय ७२ छ। पाँच सयभन्दा बढी सङ्क्रमित हुने जिल्लामा कैलाली र रौतहट रहेका छन् । शुक्रबार अहिलेसम्मकै सर्वाधिक १० हजार नमूना आरटी–पिसीआर विधिबाट परीक्षण गरिएको थियो ।
पछिल्लो २४ घण्टामा १११ जना संक्रमण निको भएर डिस्चार्ज भएका छन् भने योसँगै डिस्चार्ज हुनेको कूल संख्या १४ हजार ६०३ रहेको छ । सङ्क्रमितहरु नहुने जिल्लामा भोजपुर ,संखुवासभा, रसुवा, मनाङ र मुस्ताङ जिल्ला रहेका छन् ।
