आधारभूमि संवाददाता
काठमाडौं, १८ साउन
यस सिजनको इटालियन सिरि ‘ए’ फुटबलको च्याम्पियन युभेन्ट्स सिजनको अन्तिम खेलमा अग्रता जोगाउन नसक्दा पराजित भएको छ । गएराति युभेन्ट्सको घरेलु मैदानमा भएको खेलमा च्याम्पियन युभेन्ट्स रोमासंग ३–१ गोल अन्तरले पराजित भएको हो ।
खेलमा युभेन्ट्सको लागि गोन्जालो हिगुइनले एक गोल गरे भने रोमाको लागि निकोला कालिनिकले एक र डिएगो पेरोटीले दुई गोल गरे ।
खेलमा पहिलो अग्रता युभेन्ट्सलेनै लिएको थियो । खेलको ५ औँ मिनेटमा युभेन्ट्सका गोन्जालो हिगुइनलेगोल गर्दै टोलीलाई अग्रता दिलाएका थिए। रोमाको निकोला कालिनिकले २३ औं मिनेटमा गोल गर्दै खेल बराबरीमा ल्याए ।
दोस्रो हाफको ४४औं मिनेटमा रोमाका डिएगो पेरोटीले गोल गर्दै २ -१ को अग्रता दिलाए । त्यसको ८ मिनेट पछि डिएगो पेरोटीले पेनाल्टीमा व्यक्तिगत दोस्रो गोल गर्दै ३ -१ को अग्रता दिलाए । त्यसपछि कुनै गोल हुन सकेन र सिजनको अन्तिम खेलमा च्याम्पियन युभेन्ट्स रोमासंग पराजित भएको हो ।
युभेन्ट्सले ३८ खेलबाट ८३ अंक जोढ्दै लिगको अन्त्य गरेको छ । युभेन्ट्सले लिगको उपाधि यस अघि नै जितिसकेको छ । युभेन्ट्सले दोस्रो स्थानको इंटर मिलानसँग १ अंकको अग्रता बनाएको छ । समान खेलबाट दोस्रो स्थानको इंटर मिलानको ८२ अंक छ। तेश्रो स्थानमा रहेको एट्लान्टाको समान खेलबाट ७८ अंक छ। रोमा ७० अंक सहित पाँचौ स्थानमा रह्यो ।
