आधारभूमि संवाददाता
काठमाडौं,साउन १४
वर्षा लागेसँगै उत्पादन बढेपछि १८ वटा जलविद्यु आयोजनाको विद्युत खेर गएको छ । प्रसारणलाइनको अभावमा जलविदुत आयोजनाले अहिले पुर्ण क्षमतामा विद्युत उत्पादन गर्न सकेका छैनन् ।
कम क्षमताका प्रसारणलाइनबाट विद्युत पठाउनुपर्दा उत्पादन घटाउनु परेको हो । ठूला क्षमताको प्रसारणलाइन निर्माणको काम अघि बढाएको भएपनि अहिलेसम्म निर्माण सम्पन्न भएको छैन ।
सोलुखुम्बुमा सोलु खोला जलविद्युत आयोजनाको १७ मेगावाट विद्युत चैतबाट खेर गइरहेको छ । १ सय ३२ केभीको सोलु कोरिडोरको निर्माण नसकिएकाले सोलु खोलाको विजुली राष्ट्रिय प्रसारणलाइनमा जोडिएको छैन ।
दोखलामा २५ मेगावाटको सिंगटी खोला जलविद्युत आयोजना सम्पन्न भएपनि उसले १ सय ३२ केभीको सिंगटी– लामोसाँघु प्रसारण लाइन नबनेकाले व्यावसायिक उत्पादन थालेको छैन ।
प्रसारण लाइनको समस्याले १३ दशमलव ६ मेगावाटको थापाखोला, ५ मेगावाटको पिखुवा खोला, ४ मेगावाटको सभा खोला, ४ दशमलव ४ मेगावाटको हेवा खोला र ३ मेगावाटको पिलुवाखोला पनि पूर्ण क्षमतामा चलेका छैनन् ।
दोलखा करिडोरमा रहेका १० मेगावाटको सुप्रिम खोला, ४ मेगावाटको चर्नावती २ दशलमव ४ मेगावाटको जिरी र २ दशमलव ८ मेगावाटको साकेखोला जलविदुत आयोजना जम्मा ३० प्रतिशत क्षमतामा मात्रै चलेका छन् । बर्षा लागेसँगै पुर्ण क्षमतामा चल्न संभव भएपनि प्रसारणलाइनबाट पुर्ण क्षमतामा बिजुली प्रसारण गर्न संभव नभएपछि ३० प्रतिशत मात्रै उत्पादन गरेका छन् ।
त्यसैगरि लमजुङ करिडोरमा रहेका आयोजनाले पनि ५० प्रतिशत मात्रै विदुत उत्पादन गरेका छन् । ४ मृगावाटको खुदी, ५ मेगावाटको सिउरी , ४ दशमलव ५ मेगावाटको रादी, २ दशमलव ५ मेगावाटको छ्याङदी खोलाले ५० प्रतिशत मात्रै विद्युत उत्पादन गरेका छन् ।
निजी क्षेत्रको लगानीमा अहिले करिब २८ सय मेगावाटका जलविद्युत आयोजना निर्माणाधिन छन् । प्राधिकरणले नै बनाइरहेको ४ सय ५६ मेगावाट क्षमताको माथिल्लो तामाकोशी सम्पन्न हुने चरणमा छ । अहिले रातको समयमा २ सय मेगावाट विद्युत खेर गइरहेको छ, माग बढाउन नसके एक वर्षपछि ६ सय मेगावाट विद्यूत खेर जाने प्राधिकरणकै प्रक्षेपण छ ।
