आधारभूमि संवाददाता
काठमाडौँ, १३ साउन
नेपालमा कोरोना सङ्क्रमणबाट थप एक जनाको मृत्यु भएको छ । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले
बझाङका एक पुरुषको कोरोना सङ्क्रमणबाट मृत्यु भएको जानकारी दिए ।
मृत्यु हुनेमा बझाङ जिल्ला बुंगल गाउँपालिका-३ स्थाइ ठेगाना भएका ६५ वर्षीय एक पुरुष रहेका छन् । उनको साउन ९ गते घरमै निधन भएको हो । उनी असार २४ गते भारतको बाङ्लोर बाट बझाङ पुगेका थिए । उनी दम रोगका बिरामी थिए ।
यो सँगै नेपालमा कोभिड –१९ बाट मृत्यु हुनेको सङ्ख्या ४९ पुगेको छ ।
त्यस्तै पछिल्लो २४ घण्टामा २७ वटा प्रयोगशालामा पीसीआर विधिबाट ५ हजार ३२ जनाको परीक्षण भएको छ । क्वारिन्टिनमा रहेका व्यक्तिहरुको सङ्ख्या १५ हजार ३३१ रहेको छ । कोरोना सक्रिय संक्रमितको संख्या ५ हजार १ सय ३९ छ। पाँच सयभन्दा बढी सङ्क्रमित हुने जिल्लामा कैलाली र
रौतहट रहेका छन् ।
पछिल्लो २४ घण्टामा १२१ जना संक्रमण निको भएर डिस्चार्ज भएका छन् भने योसँगै डिस्चार्ज हुनेको कूल संख्या १३ हजार ८७५ रहेको छ । सङ्क्रमितहरु नहुने जिल्लामा भोजपुर ,संखुवासभा, रसुवा, मनाङ र मुस्ताङ जिल्ला रहेका छन् ।
