आधारभूमि संवाददाता
काठमाडौं ,११ साउन
प्रेम संवन्धलाई निहुँ बनाई राजधानीमै एक युवतिमाथि एसिड आक्रमण भयो ।
सर्वोच्च अदालतले श्रीमतीको हत्या गरेको प्रमाणित भएपछि सर्वस्वसहित जन्मकैद सजाय भोगिरहेका रञ्जन कोइरालालाई सजाय घटाएर रिहा गर्ने फैसला गर्यो ।
निर्मला पन्तको बलात्कारपछि हत्या भएको दुई वर्ष पुग्दापनि सरकारले दोषीलाई कारबाही गर्न सकेको छैन ।
हिट एण्ड रन मुद्दामा अभियुक्त पृथ्वी मल्ललाई पाँच लाख धरौटीमा रिहाई गरियो ।
यी घटना त महिला विरुद्ध भएका जधन्य अपराधका घटना हुन् । यी घटनाले महिला हिंसा मात्र नभइ हत्याका उदेश्यले गरिएका नियोजित अपराध हुन् । यस्त घटनामा सरकारले तत्काल छानविन गरी दोषीलाई कारवाही गर्नुको साटो दोष प्रमाणित भएकालाई समेत उन्मूक्ति दिनु दूर्भाग्य हो ।
जसको कारण पछिल्लो समय महिला विरुद्धका हिंसाले भयावह रुप लिंदै छ । परिवारका सदस्यले नै हत्या गरेको तथा जिउँदै जलाएका खवरहरु आइरहेका छन् । कोराना भाइरस नियन्त्रणको लागि लकडाउन सरकारले गरेको अवधिमा पनि महिला हिंसा बढिरह्यो ।
गैरसरकारी संस्था महिला पुर्नस्थापना केन्द्र (ओरेक) ले नेपालमा लकडाउनको समयमा ५१ वटा जिल्लाहरुमा ६२४ जना महिला तथा बालिकामाथि विभिन्न प्रकारका हिंसा भएको जनाएको छ ।
ओरेकका अनुसार घरेलु हिंसाका घटनामध्ये २२९ वटा शारीरिक हिंसा र ८३ वटा मानसिक हिंसाका घटना रहेका छन् । जुन घटनालाई हेर्दा महिलाहरुलाई दाइजो नल्याएको वा कम ल्याएको निहुँमा बुहारीमाथि दैनिक रुपमा शारीरिक तथा मानसिक यातना दिने गरेको पाइएको छ ।
ओरेकले बन्दावन्दीको समयमा संकलन भएका हिंसाका घटनाहरु मध्ये सबैभन्दा बढी ६१ प्रतिशत अर्थात ३७९ जना महिलाहरु आफ्नै श्रीमान र परिवारका सदस्यहरुबाट हिंसा भएको तथ्याँक रहेको जनाएको छ ।
महिला विरुद्ध भएका हिंसा र त्यसमा सरकारको उदासिनताको सर्वत्र विरोध भैरहेको छ । प्रमुख प्रतिपक्षी दल नेपाली कांग्रेसको भातृ संगठन नेपाल महिला संघले देशमा भएका विभिन्न महिला हिंसाका घटनाका प्रत्यक्ष दोषीहरूलाई कुनैपनि हालतमा उन्मुक्ति दिन नहुने र घटनामा संलग्नहरूलाई कडाभन्दा कडा कारबाही नगरीए देशव्यापी रूपमा सशक्त आन्दोलन गर्ने चेतावनी दिएको छ ।
नेपाल महिला संघकी महासचिव तथा पूर्व सांसद धना खतिवडाले नेपालमा पछिल्लो समय महिला हिंसाका घट्नाहरु दिनप्रतिदिन बढिरहेको बताउँदै घट्नामा संलग्न दोषीहरूलाई कडाभन्दा कडा कारबाही गरिनुपर्ने माग गरिन् ।
उनले एसिड आक्रमण गर्ने अपराधीहरुलाई कडा कारबाही गरिनुपर्ने माग गरिन् । साथै आफ्नै श्रीमती गीता ढकालको हत्या गरेको आरोपमा सर्वस्वसहित जन्मकैद पाएका पूर्व डिआइजी रञ्जन कोइरालालाई सर्वोच्चले कैद मिनाह गरेको फैसलाप्रति उनले आपत्ति जनाईन् ।
त्यस्तै जनता समाजवादी पार्टी, नेपालकी केन्द्रीय सदस्य पवित्रा तिमिल्सिनाले देशमा स्थानीय तहदेखि राष्ट्रपतिसम्म महिला हुँदापनि महिलामाथि हिंसाका घट्ना नरोकिएको दुःख व्यक्त गरिन् ।
यसैगरी नेपाल विद्यार्थी संघकी केन्द्रीय उपाध्यक्ष तुलसा पन्तले पछिल्लो समय न्यायलयप्रति जनविश्वास घटेको बताइन् ।
महिलाहरु आर्थिक र सामाजिक रुपमा सशक्त नभएका कारण उनीहरु विरुद्ध परिवार र समाजका सदस्यले हिंसा गर्ने गरेका छन् ।
महिलालाई शिक्षाको समान अवसर दिने तथा आय आर्जन र रोजगारीका व्यवस्था गर्ने हो भने पनि महिला सशक्त हुनेथिए र यस्ता अपराध रोकिने थिए ।
महिलालाई शिक्षा र सम्पत्तिको अधिकार दिलाउन सरकारले पहल गर्नुपर्ने खाँचो छ ।
