आधारभूमि संवाददाता

काठमाडौं, साउन ९

सुनचाँदीको मूल्य आज फेरि १३०० ले बढेको छ । नेपाल सुनचाँदी महासंघले सुनको मूल्य हालसम्मकै उच्च रहेको जानकारी दिएको छ । बिहीबार छापावाल सुन प्रतितोला रु ५०० रुपैयाँले बढेर ९४ हजार ५०० मा कारोवार भएको थियो ।

महासंघका अनुसार आज एकैदिनमा छापावाल सुन प्रतितोला १३०० रुपैयाँले बढेर ९५ हजार ८०० पुगेको छ । आज तेजावि सुनको मूल्य प्रतितोला ९५ हजार ३६५ निर्धारण भएको छ । बिहीबार तेजाबी सुन प्रतितोला रु ९४ हजार ६५ मा कारोवार भएको थियो ।

सुनको मूल्य बढेसँगै आज चाँदीको मूल्य पनि ५ रुपैयाँले वृद्धि भएको छ । चाँदी प्रतितोला ११ सय ५० पुगेको महासंघले जनाएको छ । बिहीबार चाँदी तोलामा रु १० ले बढेर ११ सय ४५ रुपैयाँमा कारोबार भएको थियो ।