आधारभूमि संवाददाता
काठमाडौँ, १९ असार
कोरोना सङ्क्रमणबाट थप एक जनाको मृत्यु भएको छ । स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले काठमाडौं नयाँ बानेश्वरका ८५ वर्षीय एक वृद्धको कोरोना सङ्क्रमणबाट मृत्यु भएको जानकारी दिए ।
ती वृद्धको असार १७ गते उपचारका क्रममा एक निजी अस्पतालमा मृत्यु भएको हो । वृद्धलाई रक्तचाप र पार्किन्सनको समस्या थियो । छाती दुखेको र पिसाब कम भएको समस्या देखिएपछि वृद्धलाई अस्पताल भर्ना गरिएको थियो र आइसोलेसनमा राखी उपचार भइरहेका बेला उनको मृत्यु भएको हो ।मृतक ती वृद्धको पिसिआर परीक्षण गर्दा पोजेटिभ आएको गाैतमले बताए।
योसँगै नेपालमा कोरोना संक्रमणबाट ज्यान गुमाउनेको संख्या ३२ पुगेको छ।