आधारभूमि संवाददाता
काठमाडौं, असार १८
लकडाउनका कारण घरभाडा तिर्न नसकेका पसलेहरु होउन् वा त ठेलागाडा चलाउनेहरु , सबैसँग अहिले पैसा अभाव छ । त्यसका लागि उनिहरुले यसअघि सहकारीमा राखेको पैसा भटाभट निकाल्न थालेका छन् ।
ब्यापार व्यवसाय नभएपछि बिशेषगरि सहरी क्षेत्रका ब्यापारीहरुले सहकारीमा राखेको पैसा निकालेर घर जान खोजिरहेका छन् । न्युरोडमा खुलेका पसलहरुमा ब्यापार नभएपछि त्यो क्षेत्रका ब्यापारीले भटाभट सहकारीबाट पैंसा निकालिरहेका छन् । जसका कारण सहकारीमा अहिले तरलता अभावको भय सिर्जना भएको छ ।
तर सहकारी अभियन्ता होउन् या त सहकारी विभागका उच्च पदस्थ नै, सबैले यसलाई लसकाउन चाहन्छन् । तर ब्यापार व्यवसाय पुन सञ्चालन गर्नका साथै घरधन्दा चलाउन अहिले सहकारीबाट बचत फिर्ता लिने बढेको छ ।
तर आम्दानी नभएका कारण बचत गर्नेहरु भने छैनन् । जसका कारण आगामी दिनमा सहकारीहरुले ऋण दिन नसक्ने स्थिती आउने हो कि भन्ने भय पैदा भएको छ ।
ग्रामीण क्षेत्रमा रहेका सहकारीहरुमा भने खेतीकिसानीबाट प्राप्त आय र रेमिट्यान्सका कारण सहकारीहरुमा बचत बढेकै छ । तर सहकारी क्षेत्रमा सञ्चालित सहकारीहरुले भने ऋणको सावा र ब्याज उठाउन पाएका छन् नत बचत नै बढेको छ ।
लकडाउनका कारण ८० प्रतिशत सहकारीहरु प्रभावित भएको सहकारी सञ्चालकहरु बताउँछन् । रकम फिर्ता जाने डरले सहकारी क्षेत्रका केहि सहकारी त लकडाउन खुलेपछि पनि कार्यालय खालेका थिएनन् । जसका कारण विभागले १० दिन अघि सहकारीहरुलाई परिपत्र गर्दै सहकारी सञ्चालनमा ल्याउन निर्देशन नै दिनुपरेको थियो ।
पैसा निकाल्नेहरु बढेपछि तरलता अभाव हुने भयका कारण अहिले सहकारी क्षेत्रका विभिन्न विषयगत संघहरुले तरलता व्यवस्थापन कोषहरु बनाउन लागिरहेका छन् । सहकारी बैंकले आफ्ना सदस्यहरुमा तरलताको अभाव नहोस् भनेर ५ अर्ब रकम छुट्टाएको छ ।
तरलता अभावको स्थिती सिर्जना हुन थालेपनि यसको बारेमा खासै कोहि खुलाउन चाहदैनन् । किनकी अभावको कुरा बाहिर गयो भने रकम निकाल्ने लाइन लाग्ने हुन कि भन्ने सञ्चालकहरुमा भय छ ।
