आधारभूमि संवाददाता
भक्तपुर, १५ असार
विकासमै अब्बल मानिएको सूर्यविनायक नगरपालिकाको बालकोटमा दैनिक आवत जावतमा निकै कठिन परिस्थति सृजना भएको छ । बर्खाको समयमा ललितपुर र भक्तपुर जोड्ने उक्त सडकमा दैनिक ४ देखि ५ मोटरसाइकल चिप्लेर लड्ने र पैदल यात्रुहरुलाई समेत बाटो हिड्न असहज भएको स्थिानीय रामेश्वर श्रेष्ठले बताए । उनका अनुसार उक्त बाटोमा पैदल यात्रु, मोटरसाइकल र चार पांग्रे सवारी साधनलाई आवत जावत गर्न निकै कठिनाई भइरहेको छ । श्रेष्ठले भने, “वर्षको अन्त्यमा बजेट सक्ने प्रवृति यहाँ पनि देखियो । स्थानिय सरकारले ग्रभेल गरे जस्तो गरेर ट्रिपरमा माटो ल्याएर छरेका छन् । पानी पर्यो भने बाटो झन चिप्लो हुन्छ र बाटो हिड्नेलाई झन खतरा हुन्छ ।” बाटोको यस्तो अवस्थाका कारण अपतकालिन स्थितिमा आवत जावत गर्न निकै खतरापूर्ण रहेको अर्का स्थिानीय नारायण श्रेष्ठले बताए ।
चांगाथलीबाट बालकोट जाने क्रममा निर्माणाधिन बाटोमा चिप्लीएर लडेकी स्थिानिय कान्छीमाया नेपालीले भनिन्, “बाटोको किनारा भएर हिड्दा चिप्लीएर लडे र झन्डै खुट्टा भाचिएको थियो । साथमा दुई जना साथी नभएको भए कति बेर हिलोमा गाडीएरु बस्नु पर्ने थियो । यो सडक होइन, यात्रुहरुका लागि धराप हो । सरकारले पैसा मात्र हेर्न की विकास पनि हेर्ने ?”
भक्तपुरकै अन्य सडकहरुमा पनि सडक मर्मतका नाममा बजेट सक्ने प्रवृति रहेको छ र सरकारको यस्तो प्रवृतिले स्थिानीयहरुले निकै सास्ती खेप्नु परेको छ ।
