काठमाडौं, बैशाख १६
पर्सा, मोरङ, झापा र सर्लाहीका छुट्टाछुट्टै ४ स्थानमा भएको आगलागीबाट करिब ३१ लाख ४० हजार रुपैयाँ बराबरको धनमाल जलेर नष्ट भएको छ । आगलागी भएकामध्ये पर्सा वीरगंज महागनरपालिका-१३ तेजारथ टोल बस्ने विनय नेपालको प्लाष्टीक पाईप फैक्ट्रीमा स्टोर गरी राखेको प्लाष्टीकका पाईपहरू तथा हाल नम्बर नखुलेको मोटरसाइकल पूर्णरुपमा जलेर करिब १० लाख रुपैयाँ र मोरङ बुढिगंगा गाउँपालिका-२ बस्ने लक्ष्मी निरौलाको घर जलेर करिब २ लाख रुपैयाँ बराबरको धनमाल जलेर नष्ट भएको हो ।
यसैगरी झापा दमक नगरपालिका-७ स्थित रहेको एभरेष्ट फर्निचर उद्योगमा विद्युत सर्ट भई आगलागी हुँदा काठको कुर्सी २० थान, प्लाईउड, ईलेक्ट्रिक मेसिनहरु र टिनको छानो भएको घर समेत जलेर करिब १८ लाख रुपैयाँ र सर्लाही ईश्वरपुर नगरपालिका-६ बयलवास बस्ने रामईश्वर प्रसाद साहको किचन कोठमा विद्युत सर्ट भई आगलागी हुँदा फ्रिज, ग्याँस सिलिण्डर र खाद्य सामग्री समेत जलेर करिब १ लाख ४० हजार रुपैयाँ बराबरको धनमाल नष्ट भएको हो । पर्सामा सोमबार दिउँसो, मोरङमा सोमबार राति तथा झापा र सर्लाहीमा मंगलबार बिहान आगलागी भएको हो ।
स्थानीय बासिन्दा र दमकलको सहयोगमा आगलागी नियन्त्रणमा लिनुका साथै यस सम्बन्धमा स्थानीय प्रहरीले आवश्यक अनुसन्धान गरिरहेको छ ।
