आधारभूमी संवाददाता
काठमाडौँ, १७ माघ
अब सामाजिक सञ्जालमा विज्ञापन गर्न नपाइने भएको छ । नेपाल राष्ट्र बैंकले सामाजिक सञ्जालमा विदेशी मुद्रा खर्च गरेर विज्ञापन नगर्न आग्रह गर्दै विज्ञापन गरेको पाइएमा कारवाही गर्ने जनाएको छ ।
नेपाल राष्ट्र बैंकले फेसवुक, ट्वीटर, यूटुब जस्ता सामाजिक सञ्जालमा ‘बुस्ट’ गरेर विज्ञापन गर्दा अवैधानिक तरिकाले भुक्तानी भएको भन्दै सामाजिक सञ्जालमा विज्ञापन गर्नमा नपाइने जनाएको छ ।
विदेशी मुद्रा खर्च गरेर गरिने विज्ञापनमा कडाइ गर्दै
राष्ट्र बैंकले शुक्रबार एक सूचना जारी गर्दै अब सामाजिक सञ्जालमा विज्ञापन गरी रकम भुक्तानी गरे मुद्रा अपचलनको मुद्दा लाग्ने जनाएको छ ।
पछिल्लो समय सामाजिक सञ्जालमा व्यक्ति तथा संस्थाहरुले विज्ञापन गर्ने क्रम बढेको छ । सामाजिक सञ्जालमा धेरैको पहुँच हुने भएकाले सामाजिक सञ्जालमा विज्ञापन गर्नेको संख्या बढ्दो छ । अहिले फेसबुक पेज बनाउने र फेसबुकलाई पैसा तिरेर प्रचार गर्ने प्रवति नै बनिसकेको छ ।
खासगरी सञ्चारमाध्यम, उद्योगी, व्यवसायीहरु समेत सामाजिक सञ्जालमार्फत आफ्नो उत्पादनको विज्ञापन गर्ने गरेका छन् ।
सरकारले सामाजिक सञ्जालको प्रयोग नियमनका लागि सूचना प्रविधिको सम्बन्धमा व्यवस्था गरेको विधयेक, २०७५ संसदमा दर्ता गराएको छ । यो विधयेक संसदीय समितिबाट पारित पनि भइसकेको छ ।
