लमजुङ, २ माघ (रासस)
बेँसीशहर नगरपालिकाका उपभोक्ताका घरघरमा वडा नं १० बाझखेतस्थित भाचोकखोलाको पानी पुगेको छ । नेपाल सरकार र बेँसीशहर खानेपानी तथा सरसफाइ उपभोक्ता समितिको संयुक्त लगानीमा बेँसीशहर खानेपानी सहलगानी आयोजनामार्फत भाचोकखोलाको पानी आजबाट बेँसीशहरका घरघरमा पुगेको हो ।
बेँसीशहरमा यसअघि उपलब्ध भइरहेको पानी पर्याप्त नभएपछि भाचोकखेलाको पानी चण्डिाडाँडामा निर्माण भएको आठ लाख ३० हजार लिटरको पानी जम्मा गर्ने मूल ट्याङ्कीमा ल्याएर त्यहाँबाट वितरण गरिएको उपभोक्ता समितिका अध्यक्ष कृष्णकुमार प्रधानले बताउनभुयो । उपभोक्ता समितिले दुई हजार ६७० धारामा पानी वितरण गर्दै आएको छ । यसअघिको पानीले करिब ४० हजार जनसङ्ख्या लाभान्वित भएको र भाचोकखोलाको पानी वितरण भएपछि नगरका वडा नं ७, ८, ९ र १० गरी करिब ७० हजारभन्दा बढी नागरिक लाभान्वित भएका समितिले जनाएको छ ।
यस आयोजनाबाट प्रति सेकेन्ड २५ लिटर पानी आएको छ । यसअघि पानीको समस्या हुँदै आए पनि यस आयोजनाबाट पानी वितरण भएकाले आगामी २० वर्षसम्म बेँसीशहरवासीमा पानीको समस्या नहुने उपभोक्ता समितिका अध्यक्ष प्रधानको भनाइ छ । बेँसीशहरमा पहिलोपटक २०५० सालबाट खानेपानी वितरण गर्न शुरु गरिएको थियो । त्यसयता ठूलोपँधेरोलगायतबाट खानेपानी वितरण भइरहे पनि पर्याप्त नभएपछि यस आयोजनाको पानी वितरणले नगरवासीलाई ठूलो सहयोग पुगेको नगर प्रमुख गुमानसिंह अर्यालले बताउनुभयो ।
खानेपानी आयोजना बेँसीशहरबाट भाचोकखोला उखुवारीसम्मको दूरी छ किलोमिटर छ । हाल आयोजनाको रकिङ फिल्टर निर्माण, टेडिमेन्टेसन, पाँच लाख १५ हजार लिटरको पानी ट्याङ्की, तीन लाख लिटरको पानी ट्याङ्की र एक लाखको पानी ट्याङ्की निर्माण गरेर मूल ट्याङ्कीमा सबै पानी जम्मा गरेर पानी वितरण गरेको उपभोक्ता समितिका अध्यक्ष प्रधानको भनाइ छ ।
यस आयोजना नेपाल सरकारको ७० प्रतिशत र उपभोक्ताको ३० प्रतिशत लगानी हुने गरी रु २८ करोड ८३ लाख लागतमा निर्माण सम्पन्न भएको बताइएको छ । खानेपानी आयोजनाको निर्माण ठेक्का पाएको महादेव खिम्ति पराजुली जेभीले ०७४ साउनबाट शुरु गरिएको आयोजना २०७६ को असार मसान्तमा सम्पन्न गर्नुपर्ने सम्झौता भएको थियो तर निर्धारित समयमा काम सम्पन्न नभएपछि पुनः छ महिनाको थप गरिएको म्याद गत पुस १८ गतेसम्मे थियो ।
