बागलुङ, १८ पुस (रासस)
निसीखोला गाउँपालिका–२ काल्नेचौरमा गाउँदेखि ५०० मिटर तलको मुहानबाट ‘पम्पिङ’ गरेर खानेपानी उपलब्घ गराइएको छ । अर्नाकोट देउराली ग्रामिण खानपानी तथा सरसफाइ आयोजनामार्फत देउराली, घम्पु, बेङ्ग्री र थुम गाउँका १९२ घरधुरीमा खानेपानी सुविधा पुगेको हो ।
खानेपानी ‘पम्पिङ’ गर्न १८ किलोवाटको लघुजलविद्युत् आयोजनासमेत निर्माण गरिएको आयोजनाका अध्यक्ष लालबहादुर कुँवरले जानकारी दिनुभयो । निसीखोला गाउँपालिकाको ३६ लाख अनुदान, रेडक्रस कास्कीमार्फत् युनिका फाउण्डेशन नेदरल्याण्डस्को रु १९ लाख तथा स्थानीयवासीको रु १५ लाख बराबरको जनश्रमदान गरी करिव रु ७० लाखको लागतमा आयोजना सम्पन्न भएको जनाइएको छ ।
आयोजना निर्माणमा कर्मफ्लाइट्स फाउण्डेशन र एशियन पावर कम्पनीले प्राविधिक सहयोग गरेका थिए । आयोजनाबाट उत्पादित बिजुलीमध्ये १० किलोवाट स्थानीयवासीले उपभोग गरेका छन् । बाँकी पानी ‘पम्पिङ’मा खपत भएको छ । चरम खानेपानीको संकट व्यहोर्दै आएका स्थानीयवासी गाउँमा खानेपानी ल्याइएपछि औधि खुशी छन् ।
गाउँको तल मुहान भएका कारण गाउँमा खानेपानी सुविधा पु¥याउन सहज थिएन । आठ वर्षअघि सोही ठाउँमा बनेको ‘पम्पिङ’ आयोजना प्रभावकारी नभएपछि नयाँ आयोजना निर्माण गरिएको थियो ।
आयोजना निर्माणको काम गत जेठ १५ गतेदेखि शुरु भएको थियो । आयोजना क्षेत्रमा रहेका पुराना खानेपानी ट्याङ्कीसमेत मर्मत गरी प्रयोगमा ल्याइएको छ । गाउँपालिका अध्यक्ष तारानाथ पौडेलले सबै गाउँबस्तीमा स्वच्छ खानेपानीको सुविधा पु¥याइने बताउनुभयो ।
“विभिन्न निकाय र सङ्घसंस्थासँग मिलेर खानेपानी र सरसफाइको अभियानलाई तीव्रताका साथ अगाडि बढाउँछौँ”, उहाँले भन्नुभयो । अर्नाकोट आधारभूत विद्यालयका प्रधानाध्यापक बेगबहादुर कुँवरले ‘पम्पिङ’ प्रविधिको खानेपानी आयोजनाले गाउँलेलाई राहत दिलाएको प्रतिक्रिया दिनुभयो ।
पछिल्लो समय जिल्लामा यस्तो प्रविधि अपनाएर धमाधम खानेपानी आयोजना निर्माण भइरहेका छन् ।
