काठमाडौं, भदाै ७
अमेरिकामा नेपाली नर्स ममता काफ्ले बेपत्ता भएको घटनामा उनका श्रीमान समातिएका छन् । काफ्ले बेपत्ता भएको तीन सातापछि मात्र प्रहरीले श्रीमान नरेश भट्टलाई पक्राउ गरेको हो ।
भर्जिनिया प्रहरीले मनासस पार्कस्थित नरेशको घरबाटै उनलाई पक्राउ गरेको स्थानीय सञ्चारमाध्यम सेभेन न्युजले जनाएको छ । ममताको मृत्यु भइसकेको आंकलन गरिएको र शव ममताकै श्रीमान नरेशले लुकाएको हुनसक्ने सुराकका आधारमा उनलाई पक्राउ गरिएको मनासस पार्कका प्रहरी प्रमुख मारिओ ल्युगोले सेभेन न्युजसँग बताएका छन् ।
बेपत्ता ममतालाई खोज्न त्यहाँको प्रहरीले १० भन्दा बढी खोजी अपरेसन चलाएको थियो । बुधबार मनासस पार्कस्थित उनीहरूको घरमा प्रहरीले छापा मारेको थियो । त्यतिबेला नरेशले सहयोग नगरेको प्रहरी प्रमुख ल्युगोलाई उद्धृत गर्दै सेभेन न्युजले उल्लेख गरेको छ । ममताको बेपत्ता घटनामा नरेश शंकास्पद देखिएको प्रहरीको भनाइ छ ।
