काठमाडौं २३ कार्तिक
जाजरकोट केन्द्रबिन्दु भएको भूकम्पमा परेर हालसम्म १५३ जनाको ज्यान गएको छ भने २६४ जना घाइते भएका छन् । गृह मन्त्रालयको विवरण विपद् पूर्वतयारी तथा प्रतिकार्य शाखाका अनुसार उक्त भूकम्पले पश्चिम नेपालका कुल १३ जिल्लामा क्षति पुगेको छ ।
ती जिल्लाहरूमा कि व्यक्तिगत घरहरूमा पूर्ण वा आंशिक क्षति भएको छ कि सरकारी कार्यालयहरूमा क्षति पुगेको छ जनाइएको छ।सबैभन्दा धेरै प्रभावित रुकुम पश्चिम र जाजरकोटमै धेरै घर तथा भवनहरू भत्किएका छन् ।
रुकुम पश्चिममा १६ हजार ५ सय ७० घरहरू पूर्णरूपमा क्षतिग्रस्त छन् भने जाजरकोटमा १ हजार १ सय ७० घर पूर्णरूपमा भत्किएका छन् । त्यस्तै रुकुम पश्चिममा ९ हजार ९ सय ६१ घरमा आंशिक क्षति पुगेको छ भने जाजरकोटमा त्यस्ता घरको सङ्ख्या ७ हजार १ सय ६६ रहेको छ।
रुकुम पूर्वमा १८१ घरमा आंशिक र दुई घरमा पूर्ण क्षति भएको छ भने सल्यानमा ९७ घरमा आंशिक र २५ घरमा पूर्ण क्षति भएको छ। रुकुम पूर्वमा ४ वटा सरकारी कार्यालयमा पनि क्षति पुगेको छ ।
रोल्पामा ८३ घरमा आंशिक र १७ घरमा पूर्ण क्षति हुनुका साथै दुईवटा सरकारी कार्यालयमा पनि आंशिक क्षति भएको छ । नवलपरासी पूर्व, दैलेख, दाङ, बैतडी, जुम्ला, कालिकोट, प्युठान, अछामलगायतका जिल्लाहरूमा पनि केही घर भत्किएको तथा सरकारी कार्यालयहरूमा क्षति पुगेको शाखाको विवरणमा उल्लेख छ ।
उक्त क्षेत्रमा शुक्रवार राति ६।४ म्याग्निट्यूडको भूकम्प गएको थियो भने त्यसपछि सयौँ परकम्पहरू गइरहेको राष्ट्रिय भूकम्प मापन तथा अनुसन्धान केन्द्रले जनाएको छ । त्यहाँ हालसम्म ४ म्याग्निट्यूडभन्दा माथिका ८ वटा परकम्पहरू गइसकेको छ ।
