काठमाडौँ २४ असोज
सुन तस्करी प्रकरणमा मुछिएका राहुल महरासहित चार जनाविरुद्ध मुद्दा दायर भएको छ । सरकारी वकिलको कार्यालय काठमाडौँले सुन तस्करी प्रकरणमा बुधबार राहुल महरासहित चार जनाविरुद्ध मुद्दा दायर गरेको हो ।
उनीहरूविरुद्ध आपराधिक विश्वासघात, भन्सार चोरी पैठारी तथा संगठित अपराधसम्बन्धी कसुरमा मुद्दा दायर भएको हो ।
पक्राउ परेका प्रतिवादीहरूमा पूर्वसभामुख कृष्णबहादुर महराका छोरा राहुल, काठमाडौँको नागार्जुन लोकेन्द्रकुमार पौडेल र बेल्जियमका नागरिक दावा छिरिङ रहेका छन् ।
इलेक्ट्रिक चुरोट (भेप) भित्र ९ किलो सुन तस्करी गरी ल्याएको आरोपमा राहुल महरासहित चार जनाविरुद्ध मुद्दा दायर गरेको हो । चार जना प्रतिवादीमध्ये तीन जना पक्राउ परेका छन् भने प्रतिवादी बौद्धका निमा गुरुङ फरार छन् ।
