काठमाडौ १६ असोज
एक वर्षमा सात सय ६६ सरकारी कर्मचारी तथा जनप्रतिनिधि विरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले आर्थिक वर्ष ०७९/ ०८० मा ७७६ जनाविरुद्ध १६२ वटा भ्रष्टाचारका मुद्दा विशेष अदालतमा दायर गरेको हो ।
आयोगका अनुसार भ्रष्टाचार मु्द्दा लागेका ७६६ कर्मचारी र जनप्रतिनिधि मध्ये विशिष्ट श्रेणीका मध्ये एक जना २१४ जना अधिकृतस्तर, १४४ जना छन् । त्यस्तै निर्वाचित र मनोनीत २०९ जना र मतियार १९८ जना छन् ।
दायर मुद्दामध्ये सबैभन्दा बढी संघीय मामिला मन्त्रालय र स्थानीय तहका कर्मचारीले गरेका भ्रष्टाचारसंग सम्बन्धित छन् । त्यसपछि भूमि व्यवस्था मन्त्रालयका छन् । आयोगका प्रवक्ता भोला दाहालले ३६ प्रतिशत मुद्दा संघीय मामिलाका रहेको जानकारी दिए । एक वर्षमा ७६६ जनाबाट १ अर्ब ७५ करोड २१ लाख ६ हजार ६ सय ३४ रुपैयाँ बिगो मागदाबी गरिएको छ ।
१६२ मध्ये सबैभन्दा बढी ६४ वटा मुद्दा गैरकानुनी लाभ वा हानिसम्बन्धी छन् । त्यस्तै ३२ वटा मुद्दा घूससँग सम्बन्धित छन् । यसैगरी सार्वजनिक सम्पत्ति हानि नोक्सानीका २७ वटा मुद्दा छन् ।
आयोगले एक वर्षमा १८ हजार ७७९ वटा उजुरीको प्रारम्भिक छानबिन गरिएको जनाएको छ । प्रवक्ता दाहालका अनुसार ११३३ वटा उजुरी उपर विस्तृत अनुसन्धान गरिएको, ७ हजार ८६९ उजुरी तामेली गरिएको, १५२ उजुरी उपर सुझाव दिई तामेली थरिएको र ९ हजार ६४५ उजुरी उपर कानुन बमोजिम अन्य आवश्यक कारबाहीका लागि लेखी पठाइएको छ ।
