ललितपुर ७ असार
ललितपुर महानगरपालिकाका मेयर चिरीबाबु महर्जनले आर्थिक वर्ष २०८०/८१ को वार्षिक नीति तथा कार्यक्रम पेस गरेका छन्।
महानगरले आयोजना बैंक, श्रम बैंकदेखि क्लिनिङ एम्बुलेन्ससम्मको व्यवस्था गरी वार्षिक कार्यक्रम सञ्चालन गर्ने नीति लिने भएको छ।
मेयर महर्जनले बुधबार नगरसभामा पेस गरेको वार्षिक नीति तथा कार्यक्रममा आयोजना बैंकको तर्जुमा गर्ने, नागरिकका गुनासा तत्कालै सम्बोधन गर्नेगरी क्लिनिङ एम्बुलेन्सको अवधारणा लागू गर्ने विषय समेटिएको छ।
तेस्रो नगरसभामा प्रस्तुत नीति तथा कार्यक्रममा महानगरले आगामी आर्थिक वर्षमा आवधिक योजना र मध्यकालीन खर्च संरचना तर्जुमा गरी सोहीअनुसार वार्षिक बजेट तथा कार्यक्रम तर्जुमा गर्ने, कार्यक्रम कार्यान्वयन कार्ययोजना तथा खरिद कार्ययोजना तर्जुमा गर्ने, योजना कार्यान्वयनको त्रैमासिक समीक्षा गर्ने लगायतका विषयलाई प्राथमिकताका साथ समावेश गरिएको छ।
बढ्दो सवारी चापको व्यवस्थापन तथा पैदलयात्रीको सहजताका लागि महानगरको चक्रपथ खण्ड र अन्य उपयुक्त स्थानमा आकासे पुल निर्माणका लागि सम्बन्धित निकायसँग समन्वय र सहकार्य गर्ने पनि नीति छ।
धूलोरहित सडक व्यवस्थापनका लागि नख्खु खोला र अन्य उपयुक्त स्थानमा टिपर पखाल्ने प्रविधि जडानको व्यवस्था मिलाइने, टिपरलगायत मालवाहक सवारीसाधनको आवागमन नख्खु, बागमती करिडोरबाट मात्रै गर्न सम्बन्धित निकायसँग समन्वय गर्ने महानगरको नीति छ।
चालु आर्थिक वर्षमा सडक सौन्दर्यलाई ध्यानमा राखी महानगरभित्रका सडकमा हरियाली प्रवर्द्धन गर्ने नीतिअनुरूप विभिन्न स्थानमा पार्क निर्माण गरिने छ। परम्परागत पानीका मुहान, ढुंगेधारा, कुवा, इनार, पोखरी जस्ता स्रोत संरक्षण गर्ने, सिस्नेरी खोलाको पानीलाई उपत्यकामा ल्याउने सम्बन्धमा सम्बद्ध निकायको समन्वयमा आवश्यक गृहकार्य गर्ने, प्रत्येक घरमा स्वच्छ खानेपानीको पहुँच पुर्याउने, पानीको वितरण प्रणालीलाई व्यवस्थित गर्ने, पैदल यात्रुलाई शुद्ध पिउने पानीको व्यवस्थाका लागि ‘वाटर एटिएम’ सञ्चालन गर्ने लगायतका विषयलाई समेत महानगरले नीति तथा कार्यक्रममा समेटेको छ।
आगामी वर्षको नीति तथा कार्यक्रम प्रस्तुत गर्ने क्रममा महानगर प्रमुख महर्जनले पारदर्शिता अपनाएर विधिसम्मत तरिकाले काम गर्न जनप्रतिनिधिलाई आग्रह गरे।
‘हामीले गरेको कामले नागरिकमा ठूलो प्रभाव पार्छ। तसर्थ सबै जनप्रतिनिधिले पारदर्शिता अपनाएर विधिसम्मत तरिकाले काम गर्नुहोला,’ महर्जनले भने, ‘हामीले नगरवासीका लागि आयआर्जन गर्न सक्ने गरी तालिम दिने योजनालाई समेटेका छौं। केबल तालिमका लागि मात्रै नभएर साना तथा मझौला उद्यमी तयार गर्ने गरी तालिम सञ्चालन गर्छौं। उद्यमी बन्न चाहनेका लागि बीउ पुँजी दिने व्यवस्था पनि महानगरले गर्छ। आगामी वर्ष व्यावहारिक रूपमा कार्यान्वयनमा आउन नसक्ने तालिम नराख्ने महानगरको नीति छ।’
त्यस्तै उपप्रमुख मञ्जली शाक्य बज्राचार्यले सबैको सल्लाह र सुझावका आधारमा नीति तथा कार्यक्रम लागू गरिने बताइन्।
