काठमाडौ १७ जेठ
स्वास्थ्य तथा जनसंख्या मन्त्रालयले सबै अस्पतालमा निशुल्क शैय्या छुटाउन निर्देशन दिएको छ ।
स्वास्थ्य मन्त्रालयले सबै सरकारी, निजी, सामुदायिक अस्पताल, प्रतिष्ठान तथा मेडिकल कलेजहरूमा संस्था संचालन सम्बन्धी मापदण्ड अनुसार १० प्रतिशत शैय्या निशुल्क उपचारको लागि छुटाउन निर्देशन दिएको हो ।
काठमाडौँ महानगरका मेयर बालेन्द्र शाहले १० प्रतिशत निशुल्क शैय्या नछुटाउने ६८ अस्पताललाई शैय्या छुटाउन अल्टिमेटम दिएका थिए । साथै उक्त स्वास्थ्य संस्थालाई कानुनको परिधिभित्र ल्याउन स्वास्थ्य मन्त्रीसमक्ष अनुरोध गरेका थिए । मन्त्रालयले बुधबार एक विज्ञप्ति जारी गर्दै स्वास्थ्य संसथा संचालन सम्बन्धि मापदण्ड, २०७७ दफा ७० घ मा अस्पतालमा उपचारका लागि आउने विपन्न, असहाय, वेबारिसे विरामीका लागि कुल शैय्याको १० प्रतिशत छुटाउनुपर्ने व्यवस्था रहेको भन्दै उक्त निर्देशन जारी गरेको हो ।
त्यस्तै सोही मापदण्डको ७२ ९ट० विपरीत बिरामीले संस्थाबाट सेवा प्राप्त गर्न लाग्ने शुल्क, प्रक्रिया तथा अवधि समेत खुलाएको बडापत्र अस्पतालमा देखिने गरी नराखेको, अस्पतालमा पार्किङ शुल्क लिने गरेको र कार्यरत जनशक्तिलाई न्यूनतम पारिश्रमिक समेत उपलब्ध नगराएको पाएकोले सचेत गराएको छ ।
मन्त्रालयले कतिपय स्वास्थ्य संस्थाहरूमा अकस्मिक अनुगमनका क्रममा तोकिएका मापदण्ड पुरा नगरेको देखिएको र यसअघि गरिएको परिपत्रको समेत बेवास्ता गरेको पाइएकाले बुधवारको सचिव स्तरको निर्णयले मापदण्ड पूर्ण पालना गर्न भनेको छ ।
