काठमाडौ २३ असोज
निर्वाचन आयोगले आगामी मंसिर ४ गते हुने प्रतिनिधिसभा र प्रदेशसभा प्रत्यक्ष निर्वाचनमा हुने खर्चको सीमा तोकेको छ । आयोगका अनुसार प्रतिनिधिसभा निर्वाचनका प्रत्यक्ष तर्फका उम्मेदवारले कम्तिमा २५ लाख र बढीमा ३३ लाख रुपैयाँसम्म खर्च गर्न पाउने भएका छन् । आयोगले निर्वाचन क्षेत्र तोकेर खर्च सीमा कायम गरेको छ ।
सबैभन्दा कम अर्थात २५ लाख रुपैयाँसम्म खर्च गर्न पाइने निर्वाचन क्षेत्रमा काठमाडौंका ५ निर्वाचन क्षेत्र छन् । काठमाडौंका निर्वाचन क्षेत्र नम्बर १,३,६,७ र ८ का उम्मेदवारले २५ लाख रुपैयाँसम्म खर्च गर्न पाउने आयोगले जनाएको छ ।
यसैगरी प्रति उम्मेदवार २७ लाख रुपैयाँ खर्च गर्न पाइने निर्वाचन क्षेत्रको संख्या १७ छ भने ६७ निर्वाचन क्षेत्रका उम्मेदवारले प्रतिउम्मेदवार २९ लाख रुपैयाँसम्म खर्च गर्न पाउने भएका छन् । ५४ निर्वाचन क्षेत्रका उम्मेदवार ३१ लाख रुपैयाँ र बाँकी २६ निर्वाचन क्षेत्रका उम्मेदवारले ३३ लाख रुपैयाँ खर्च गर्न पाउने छन् ।
त्यस्तै प्रदेशसभा निर्वाचनको लागि आयोगले न्यूनतम खर्च सीमा १५ लाख रुपैयाँ र अधिकतम सीमा २३ लाख रुपैयाँ तोकेको छ ।
