काठमाडौं, मंसिर २३
धादिङ, जिल्ला अदालत धादिङको २०५४ वैशाख ३१ गतेको फैसलाले हाडनाता करणी मुद्दामा १० महिना कैद र १ हजार रुपैयाँ जरिवाना ठहर भई फरार रहेका प्रतिवादी निलकण्ठ नगरपालिका ५ देउरालीछाप बस्ने ५३ वर्षीय अम्बर बहादुर राना मगरलाई आइतबार प्रहरीले पक्राउ गरेको छ । मगरलाई जिल्ला अदालत धादिङ पेश गरिएकोमा अदालतको आदेशले कैद भुक्तानको लागि कारागार कार्यालय धादिङ पठाइएको जिल्ला प्रहरी कार्यालय धादिङले जनाएको छ ।
बाराको जिल्ला अदालत बाराको २०६७ जेठ २७ गतेको फैसलाले सवारी ज्यान मुद्दामा ६ महिना कैद र २ हजार रुपैयाँ जरिवाना ठहर भई फरार रहेका प्रतिवादी कोल्हवी नगरपालिका २ बस्ने सुरज खाँ चौधरीलाई आइतबार प्रहरीले पक्राउ गरेको छ । ईलाका प्रहरी कार्यालय कोल्हवी बाराबाट खटिएको प्रहरीले उनलाई लुकीछिपी बसेको अवस्थामा फेला पारी पक्राउ गरेको हो । चौधरीलाई जिल्ला अदालत बारामा पेश गरिएकोमा अदालतको आदेशले कैद भुक्तानका लागि कारागार कार्यालय वीरगंज पर्सा पठाइएको जिल्ला प्रहरी कर्यालय बाराले जनाएको छ ।
पर्वतको जिल्ला अदालत पर्वतको २०७४ माघ १२ गतेको फैसलाले वहुविवाह मुद्दामा ११ महिना ११ दिन कैद सजाय भई तारेखमा छुटी फरार रहेकी प्रतिवादी कुश्मा नगरपालिका १ बस्ने २३ वर्षीया संगिता नेपालीलाई आइतबार प्रहरीले पक्राउ गरेको छ । उक्त मुद्दामा धरौटी रकम राखि तारेखमा छुटी फरार रहेकी उनको खोजी गर्ने क्रममा जिल्ला प्रहरी कार्यालय पर्वतबाट खटिएको प्रहरीले आफ्नै घरमा लुकीछिपी बसेको अवस्थामा फेला पारी पक्राउ गरेको हो । संगितालाई आवश्यक कारवाहीका लागि आइतबार जिल्ला अदालत पर्वतमा पठाइएको उक्त कार्यालयले जनाएको छ ।
