काठमाडौ २३ जेठ
सरकारले आइतबार पनि सार्वजानिक विदा दिन गरेको निर्णय एक महिना नपुग्दै उल्ट्याएको छ । सरकारले सोमबार असार १ गतेदेखि आइतवार सार्वजानिक विदा खारेज गर्ने निर्णय गरेको छ । गत वैशाख २६ गते बसेको मन्त्रिरिषद बैठकले पेट्रोलियम पदार्थको खपत कम गर्न जेठ १ देखि शनिबार र आइतबार दुई दिन सार्वजनिक विदा दिने निर्णय गरेको थियो ।
मन्त्रिपरिषदको सोमबार बसेको बैठकले सो निर्णमा पुर्नविचार गर्दै असार १ देखि आइतबार साप्ताहिक विदा नदिने निर्णय गरेको अर्थमन्त्री जनार्दन शर्माले जानकारी दिनुभएको छ ।यस निर्णयसंगै अव असार १ देखि शनिबार मात्र सार्वजनिक विदा हुने छ ।
सातामा दुइ दिन विदा दिन सरकारले गरेको निर्णयको चौतर्फी आलोचना भएको थियो । आइतबार विदा हुँदा सेवा प्रवाहमा समस्या देखिएको भन्दै विभिन्न क्षेत्रले विदाको आलोचना गर्दै अवज्ञा समेत गरेका थिए । अधिकांश निजी विद्यालयले आइतबार विदा दिएका थिएनन् भने धेरै स्थानीय तहले आइतवार बिदा दिने निर्णयको अवज्ञा गरेका थिए ।
त्यस्तै सोमबार मात्रै सातामा दुई दिन सार्वजनिक बिदा दिने सरकारको निर्णयविरुद्ध सर्वोच्च अदालतमा दुई वटा रिट निवेदन समेत दर्ता भएका थिए। अधिवक्ताहरू रामबहादुर शाही, सन्तोष भण्डारी, तेजकुमार लोहनी र त्रिलोकबहादुर चन्दले विदा खारेजीको माग गर्दै सर्वोच्चमा रिट दर्ता गरेका थिए।
