आधारभूमि संवाददाता
काठमाडौं २२ चैत
आसन्न स्थानीय तह निर्वाचनमा भाग लिन चाहने दलले निर्वाचन आचासंहिता कार्यान्वयनमा प्रतिबद्ध रहेको भन्दै आचारसंहिता प्रतिबद्धतापत्रमा हस्ताक्षर गरेका छन् । तर नेकपा एमालेले भने प्रतिबद्धतापत्रमा हस्ताक्षर गरेको छैन ।
छलफलमा तनाव उत्पन्न भएको अवस्थामा कुनै काम गर्नु उचित नभएकाले हस्ताक्षर नगरेको एमालेको भनाइ छ ।
एमालेबाट कानुन विभागका प्रमुख रमेश बडाल र निर्वाचन विभाग उपप्रमुख निरज आचार्य आयोगले बोलएको बैठकमा सहभागी भएका थिए । मंगलबार निर्वाचन आयोगले निर्वाचनमा सहभागी हुने दलका नेताहरूलाई प्रतिबद्धतापत्रमा हस्ताक्षर गर्न बोलाएको थियो ।
राजनीतिक दलहरुबाट प्राप्त सल्लाह सुझावलाई समेत समेट्दै ऐन, कानून र संविधान अनुरुप बनाएर राजपत्रमा समेत प्रकाशित भएकाले आचार संहितामा दलहरुलाई हस्ताक्षर गर्न बोलाइएको प्रवक्ता शालिग्राम शर्मा पौडेलले बताएका छन् ।
छलफलमा नबोलाई हस्ताक्षर गर्न मात्रै बोलाइएको भन्दै साना दलहरूले विरोध पनि जनाएका थिए ।
छलफलका लागि पुनः बोलाउने प्रतिबद्धता जनाएपछि हस्ताक्षर गरिएको नेमकिपाका सांसद प्रेम सुवालले जानकारी दिए । आयोगले दलका गुनासो सुन्नुपर्ने उनको भनाइ छ ।
स्थानीय निर्वाचनमा ७९ दलले भाग लिँदै छन् ।
