आधारभूमि संवाददाता
काठमाडौं, माघ २७
इंग्लिस प्रिमियर लिग फुटबलमा शीर्ष स्थानको म्यानचेस्टर सिटीले जित निकालेको छ । बुधबार राति भएको खेलमा सिटीले ब्रेन्टफोर्डलाई २-० गोलले पराजित गरेको हो ।
घरेलु मैदानमा म्यानचेस्टर सिटीलाई जित दिलाउन रियाद महरेज र केभिन डे ब्रुइनले एक-एक गोल गरे।
खेलको ४० औं मिनेटमा महरेजले पेनाल्टीमा गोल गर्दै सिटीलाई अग्रता दिलाएका थिए।
त्यसपछि खेलको ६९ औं मिनेटमा केभिन डे ब्रुइनले गोल गर्दै टोलीलाई २-० को जित दिलाए ।
जितसँगै म्यानचेस्टर सिटीले २४ खेलबाट ६० अंक जोडेको छ र शीर्ष स्थानमा १२ अंकको अग्रता बनाएको छ ।पराजित ब्रेन्टफोर्डको २४ खेलबाट २३ अंक छ र १४ औं स्थानमा छ ।
