आधारभूमि संवाददाता
२३ मंसिर, काठमाडौं
अर्थमन्त्रालयका एक पूर्व कर्मचारी विरुद्ध ठूलो मात्रामा स्रोत नखुलेको रकम आर्जन गरेको आरोपमा मुद्दा चलाइएको छ ।
अख्तियार दुरूपयोग अनुसन्धान आयोगले अर्थमन्त्रालयका पूर्व शाखा अधिकृत उद्धवप्रसाद थपलियाविरुद्ध बिहीबार विशेष अदालतमा भ्रष्टाचार मुद्दा दायर गरेको हो ।
उनलाई विभिन्न कार्यालयमा काम गर्दा स्रोत नखुलेको १ करोड ६४ लाख ८९ हजार ७०० सय रुपैयाँ २५ पैसा आर्जन गरेको आरोप लागेको छ ।
थपलीय २०४० फागुन ६ गतेदेखि सरकारी सेवामा प्रवेश गरेका थिए । उनले २०७५ चैत ३० गते अवकाश हुनुअघिसम्म २ करोड ६७ लाख ७१ हजार ९५८८ रुपैयाँ आम्दानी गरेका थिए । अख्तियारका अनुसार उनको वैध आय १ करोड २ लाख ८२ हजार २ सय ५८ रुपैयाँ मात्र देखिन्छ ।
सो रकममध्ये एक करोड ६४ लाख ८९ हजार ७०० रुपैयाँ भ्रष्टाचार मार्फत आर्जन गरेको भन्दै अख्तियारले उक्त रकम जफत र भ्रष्टाचार निवारण ऐन अनुसार कारबाही गर्न माग गरेको छ ।
