आधारभूमि संवाददाता
काठमाडौं,१३ मङ्सिर
फ्रेन्च लिग वान फुटबलमा पेरिस सेन्ट जर्मेन (पीएसजी) ले जित निकालेको छ । आइतबार राति भएको खेलमा पीएसजीले १० खेलाडीमा समेटिएको सेन्ट-एटिएनलाई ३-१ गोलले पराजित गरेको हो ।
पीएसजीलाई जित दिलाउन मार्क्विन्होसले दुई गोल गरे भने एन्जेल डि मारियाले एक गोल गरे । सेन्ट-एटिएनका डेनिस बोआंगाले एक गोल फर्काए ।
खेलमा पहिलो अग्रता भने सेन्ट-एटिएनले लिएको थियो। खेलको २३ औं मिनेटमा सेन्ट-एटिएनका डेनिस बोआंगाले गोल गर्दे टोलीलाई अग्रता दिलाएका थिए।
खेलको ४५ औं मिनेटमा सेन्ट-एटिएन १० खेलाडीमा समेटिएको थियो ।सेन्ट-एटिएनका टिमोथी कोलोड्जीज्याकले रातो कार्ड पाउँदै मैदान छाड्न परेको थियो।जसको फाइदा पीएसजीले उठायो ।
पहिलो हाफको इन्जुरी समयमा पीएसजीका मार्क्विन्होसले गोल गर्दै खेल बराबरीमा फर्काए ।
खेलको ७९ औँ मिनेटमा एन्जेल डि मारियाले गोल गर्दै पीएसजीलाई २-१ ले अघि बढाए।
त्यसपछि दोस्रो हाफको इन्जुरी समयमा मार्क्विन्होसले व्यक्तिगत दोस्रो गोल गर्दै टोलीलाई ३-१ को जित दिलाए ।
जितसँगै पीएसजीले १५ खेलबाट ४० अंक जोडेको छ र शीर्ष स्थानमा छ ।पराजित सेन्ट-एटिएनको १५ खेलबाट १२ अंक छ र २० औं स्थानमा छ ।
