आधारभूमि संवाददात
काठमाडौँ, १७ कात्तिक
च्याम्पियन्स लिग फुटबलमा म्यानचेस्टर युनाईटेड एटलान्टासँग बराबरीमा रोकिएको छ। मंगलबार राति एटलान्टाको घरेलु मैदानमा भएको खेलमा युनाईटेडले एटलान्टासँग २–२ गोलको बराबरी खेल्दै अंक बाँढेको हो ।
खेलमा युनाईटेडको लागि क्रिस्टियानो रोनाल्डोले दुई गोल गरे भने एटलान्टाको लागि जोसिप इलिसिक र डुवान जापाटाले एक -एक गोल गरेका थिए।
खेलमा पहिलो अग्रता एटलान्टाले लिएको थियो । खेलको १२ औं मिनेटमा जोसिप इलिसिकले गोल गर्दै एटलान्टालाई अग्रता दिलाएका थिए।
तर, पहिलो हाफको इन्जुरी समयमा क्रिस्टियानो रोनाल्डोले गोल गर्दै खेल बराबरीमा फर्काए ।
दोस्रो हाफको ५६ औं मिनेटमा एटलान्टाका जापाटाले गोल गर्दै टोलीलाई २-१ ले अघि बढाए।
तर, दोस्रो हाफको इन्जुरी समयमा क्रिस्टियानो रोनाल्डोले गोल गर्दै खेल २-२ को बराबरीमा फर्काए र टोलीलाई हारबाट जोगाए ।
बराबरीसँगै युनाईटेडको चार खेलबाट सात अंक छ र समूह (एफ) को शीर्ष स्थानमा छ। एटलान्टाको चार खेलबाट पाँच अंक छ र तेस्रो स्थानमा छ ।
