आधारभूमि संवाददाता
काठमाडौं, असोज १८
इंग्लिस प्रिमियर लिग फुटबलमा लिभरपुल र म्यानचेस्टर सिटी बराबरीमा रोकिएका छन् ।आइतबार राति एनफिल्डमा भएको खेलमा लिभरपुल र सिटीले २–२ गोलको बराबरी खेल्दै अंक बाँढेको हो ।
खेलमा लिभरपुलको लागि साडियो माने र मोहम्मद सलाहले एक-एक गोल गरे भने सिटीको लागि फिल फोडेन र केविन डे ब्रुइनले एक-एक गोल गरेका थिए।
खेलमा पहिलो अग्रता लिभरपुलले लिएको थियो । खेलको ५९ औं मिनेटमा साडियो मानेले गोल गर्दै लिभरपुललाई अग्रता दिलाएका थिए।
तर, खेलको ६९ औं मिनेटमा सिटीका फिल फोडेनले गोल गर्दै खेल १-१ को बराबरीमा फर्काए ।
खेलको ७६ औं मिनेटमा लिभरपुलका मोहम्मद सलाहले गोल गर्दै टोलीलाई २-१ को अग्रता दिलाए ।
तर, खेलको ८१ औं मिनेटमा सिटीका केविन डे ब्रुइनले गोल गर्दै खेल २-२ को बराबरीमा फर्काए र टोलीलाई हारबाट जोगाए ।
बराबरीसँगै लिभरपुलको सात खेलबाट १५ अंक छ र तालिकाको दोस्रो स्थानमा छ। सिटीको सात खेलबाट १४ अंक छ र तेस्रो स्थानमा छ ।
