आधारभूमि संवाददाता
काठमाडौँ, २५ भदौ
फिफा विश्वकप २०२२ कतार अन्तर्गत दक्षिण अमेरिका छनोटमा ब्राजिलले लगातार आठौं जित निकालेको छ ।
शुक्रबार बिहान भएको खेलमा ब्राजिलले पेरुलाई २–० गोलले पराजित गरेको हो ।
ब्राजिललाई जित दिलाउन एभर्टन रिबेरो र नेमार जुनियरले एक-एक गोल गरे। ब्राजिलले दुबै गोल पहिलो हाफमा गरेको हो ।
खेलको १४ औं मिनेटमा एभर्टन रिबेरोले नेमारको पासमा गोल गर्दै ब्राजिललाई सुरुवाती अग्रता दिलाएका थिए।
त्यसपछि खेलको ४० औं मिनेटमा नेमारले गोल गर्दै ब्राजिललाई २-० को जित दिलाए ।
जितसँगै ब्राजिलले ८ खेलबाट २४ अंक जोडेको छ र शीर्ष स्थानमा छ ।पराजित पेरुको ९ खेलबाट ८ अंक छ र सातौं स्थानमा छ ।
