काठमाडौं, जेठ १०
तोसिमा कार्कीले सुर्तीजन्य पदार्थमा लाग्ने करको दर बढाएर कम्तीमा ५० प्रतिशत पुर्याउनुपर्ने माग गरेकी छन् ।
सार्वजनिक स्वास्थ्य करसम्बन्धी कार्यक्रममा बोल्दै राष्ट्रिय स्वतन्त्र पार्टी की सांसद तथा स्वास्थ्य विभाग प्रमुख कार्कीले जनस्वास्थ्य सुधार र स्वास्थ्य बीमालाई दिगो बनाउन यस्तो नीति आवश्यक रहेको बताइन् ।
कार्कीका अनुसार दक्षिण एसियाली मुलुकमध्ये नेपालमा सुर्तीजन्य पदार्थमा सबैभन्दा कम, करिब ४१ प्रतिशत मात्रै कर लाग्दै आएको छ । पर्याप्त कर वृद्धिले मात्रै उपभोग घटाउने र त्यसबाट उत्पन्न रोगको भार कम गर्न सकिने उनको भनाइ छ ।
उनले सुर्तीजन्य पदार्थले क्यान्सरका साथै रक्तनलीसम्बन्धी गम्भीर रोग निम्त्याउने उल्लेख गर्दै यसले नागरिकको उत्पादकत्व घटाउनुका साथै राज्यलाई थप आर्थिक भार पर्ने बताइन् ।
