ललितपुर, बैशाख २६
ललितपुरको महालक्ष्मी नगरपालिका–७ चाङ्गाथलीस्थित टिकाथली स्वास्थ्य चौकीको नयाँ भवन उद्घाटन गरिएको छ । बागमती प्रदेश सरकारको १ करोड १४ लाख रुपैयाँको लागतमा निर्माण सम्पन्न भएको भवनको उद्घाटन प्रदेशका स्वास्थ्य मन्त्री किरण थापा मगरले गरेका हुन् ।
उद्घाटन कार्यक्रममा बोल्दै वडा नं. ७ का अध्यक्ष बाबुराजा महर्जन ले स्वास्थ्य चौकीबाट हाल नियमित स्वास्थ्य सेवा सञ्चालन भइरहेको जानकारी दिँदै आगामी दिनमा पाँच शैयासहितको सेवा विस्तारका लागि पहल गरिने बताए ।
स्वास्थ्य चौकी स्रोतका अनुसार चौकीमा विभिन्न रोगहरूको परीक्षण सेवा उपलब्ध रहे पनि भिडियो एक्स–रे सेवा भने हाल गर्भवती महिलाका लागि मात्र सञ्चालन गरिएको छ ।
त्यस्तै, उद्घाटन समारोहमा महालक्ष्मी नगरपालिका नगर प्रमुख हरि गोविन्द श्रेष्ठ, नगर उप प्रमुख लक्ष्मी महर्जन, १ देखि १० सै वडा अध्यक्षहरु, प्रमुख प्रसासकीय अधिकृत अमृत ढुङ्गाना, शिक्षा प्रमुख चिरञ्जीवी पौडेल, स्वास्थ्य शाखा प्रमुख हेमलाल ज्ञवाली, टिकाथली स्वास्थ्य प्रमुख अजय केशरी, सबै राजनीतिक दलका प्रतिनिधिहरु, बुद्धिजीवीहरु, नगर र बडाबासीहरुको उपस्थिति रहेकाे थियाे ।
