काठमाडौं, माघ २९

जिल्ला प्रशासन कार्यालय काठमाडौंले पूर्वराजा ज्ञानेन्द्र शाहको काठमाडौं आगमनका क्रममा सम्भावित प्रदर्शनलाई नियन्त्रण गर्न त्रिभुवन अन्तर्राष्ट्रिय विमानस्थलको गोल्डेनगेटभन्दा भित्रको सम्पूर्ण क्षेत्रमा निषेधाज्ञा जारी गरेको छ ।

प्रमुख जिल्ला अधिकारी ईश्वरराज पौडेलद्वारा जारी सूचनाअनुसार विमानस्थलको गोल्डेनगेटदेखि भित्रको भागमा (आन्तरिक तथा अन्तर्राष्ट्रिय टर्मिनल क्षेत्र, पार्किङस्थल लगायत) ५ जनाभन्दा बढी व्यक्ति भेला हुन, जम्मा हुन वा प्रदर्शन गर्न पूर्ण रूपमा निषेध गरिएको छ । यो आदेश तत्काल लागू भई एक महिनासम्म कायम रहने प्रशासनले जनाएको छ ।