काठमाडौं, असार १३

राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा आजै सार्वजनिक गर्ने तयारी गरेको छ। बोर्डको आज बसेको बैठकले आवश्यक प्राविधिक कामहरू अन्तिम चरणमा पुगेको भन्दै नतिजा साढे ५ बजेपछि सार्वजनिक गर्ने निर्णय गरेको हो।

बोर्डका अध्यक्ष महाश्रम शर्माले भने, “कतिपय प्राविधिक कुरा भइरहेका छन्। तर, आजै साढे ५ बजेपछि रिजल्ट सार्वजनिक गर्नेछौं।”

यस वर्षको एसईई परीक्षामा ५ लाख १४ हजार ७१ जना विद्यार्थी सहभागी भएका थिए। गत वर्षको तुलनामा परीक्षार्थी संख्या ४९ हजार २८६ ले बढेको हो। गतवर्ष ४ लाख ६४ हजार ७८५ जना विद्यार्थीले एसईई दिएका थिए।