ललितपुर, पुस २५
ललितपुर महानगरले स्वास्थ्य बीमा कार्यक्रममार्फत गुणस्तरीय स्वास्थ्य सेवा प्रदान गर्न प्राविधिक सहयोगका लागि पाटन अस्पतालसँग सहकार्य गरेकाे छ ।
आज आयोजित कार्यक्रममा प्रमुख चिरीबाबु महर्जन र पाटन स्वास्थ्य विज्ञान प्रतिष्ठानका रजिष्टार प्रा डा.पारस कुमार आचार्य बीच सम्झदारी पत्रमा हस्ताक्षर भएको हो ।
कार्यक्रममा बोल्दै प्रमुख महर्जनले यही पुष २ गते ‘महानगरको १०५ औं स्थापना दिवस’ को अवसर पारेर आफूहरुले अपाङ्गता भएका दुई व्यक्तिलाई बीमाको कार्ड प्रदान गरी सो कामको सुरु गरेको र आउने फागुन १ गतेदेखि सम्पूर्ण नगरवासीका लागि पूर्ण रुपमा सुचारु गर्ने समेत बताए ।
कार्यक्रममा बाेल्दै मेयर महर्जनले गुणस्तरीय स्वास्थ्य सेवा प्रदान गर्न विशेष पहिचान बनाउन सफल भएको पाटन अस्पतालसँग सहकार्य गर्न पाउँदा आफूहरु ज्यादै हर्षित भएकाे बताए ।
यस्तै, पाटन अस्पतालका रजिष्टार आचार्यले प्रतिष्ठानलाई योग्य ठानेर महानगरले बीमा सम्बन्धी प्राविधिक सहयोगका लागि अवसर दिएकोमा आफूहरु ज्यादै खुशी भएको जानकारी दिए ।
महानगरले पाटन अस्पतालसँग बुधबार गरेको समझदारी पत्रमा विशेषज्ञ चिकित्सक सहितको बहिरंग तथा आकस्मिक एवं फार्मेसी र एम्बुलेन्स सेवा दिनाका साथै रेडियोलोजी सेवा समेत दिइने उल्लेख गरिएको छ ।
यसैगरी स्वास्थ्य बीमा अन्तर्गतको दाबी भुक्तानीको विवरणको हरहिसाब तोकिए बमोजिमको ढाँचामा राख्ने तथा स्वास्थ्य बीमा बोर्डबाट भुक्तानी लिने दायित्व महानगरको हुने समेत पत्रमा भनिएको छ ।
त्यसैगरी सो समझदारीको अवधि १० वर्षसम्म रहने र स्वास्थ्य बीमा कार्यक्रममा प्राविधिक कामका लागि ललितपुर महानगरको पाटन अस्पतालसँग सहकार्य हुने उल्लेख गरेको पाइन्छ ।
