काठमाडौं १३ असार
ललिता निवास प्रकरणमा भाटभटेनी सुपरमार्केटका सञ्चालक मीनबहादुर गुरुङले २९ रोपनी जग्गा हडपेको खुलेको छ ।प्रहरीको प्रारम्भीक अनुसन्धानमा सरकारी जग्गा व्यक्तिको नाममा ल्याउन गुरुङले बिचौलियाको भूमिकामा निभाउनुका साथै उक्त क्षेत्रफल बराबरको जग्गा हडपेको खुलेको हो ।
गुरुङमाथि मुलुकी ऐन २०२० अन्तर्गत सरकारी किर्तेमा कारबाही अगाडि बढ्ने बताइएको छ ।
प्रहरीले ललिता निवास प्रकरणमा मंगलवार ७ जनालाई पक्राउ गरेको थियो । जसमा तीन जना छुटेका छन् भने भाटभाटेनीका सञ्चालक गुरुङसहित अरु ४ जना प्रहरी नियन्त्रणमै छन्। ललिता निवास किर्तेमा कसको भूमिका के भन्ने विषयमा सिआईबीले बुधवार बिहान पत्रकार सम्मेलनमार्फत जानकारी दिएको हो ।
‘मीनबहादुर गुरुङले व्यवसायी, आफू र आफ्ना परिवारसमेतका नाममा जग्गा ल्याई सरकारी जग्गा आफ्नो बनाउने कार्यमा बिचौलियाको भूमिका निर्वाह गरी प्रत्यक्ष लाभसमेत लिएको, हाल निज मीनबहादुर गुरुङ र निजको परिवार तथा निजकी शेयर रहेको भाटभटनी डेभलपमेन्ट कम्पनी प्रालि समेतको नाममा करिब ३० रोपनी जग्गा कायम रहेको’ पत्रकार सम्मेलनमा प्रहरीले जारी गरेको प्रेस नोटमा उल्लेख छ ।
