काठमाडौँ १० असार
फोहरमैला व्यवस्थापनका लागि काठमाडौँ महानगरपालिकाले ८७ करोड ९३ लाख बजेट छुट्याएको छ । आगामी आर्थिक वर्ष २०८० ०८१ का लागि नगरभित्रको फोहर व्यवस्थापनका लागि महानगरपालिकाले कूल ८७ करोड ९३ लाख रुपैयाँ बजेट छुट्याएको हो ।
आगामी आर्थिक वर्षभित्रमा फोहरमैला व्यवस्थापनको उपयुक्त विधि र प्रणालीसहितको कार्यक्रम सञ्चालन गर्नका लागि उक्त बजेट छुट्याएको महानगरले जनाएको छ ।
महानगरका अनुसार सरसफाइ कार्यमा प्रयोग हुने सवारी साधन एवं यन्त्र उपकरणको उपलब्धतामा कमी नहुने व्यवस्था गर्न त्यस्ता सवारी साधन र उपकरण खरिद गर्नका लागि मात्र २७ करोड रुपैयाँ विनियोजन गरिएको छ । उपमेयर सुनिता डंगोलले जानकारी दिइन् ।
महानगर क्षेत्रभित्रका नदीहरुको नियमित सरसफाइ गरी नदी किनार क्षेत्र समेतको संरक्षण कार्यक्रमलाई महानगर स्वर्णिम योजनाको रुपमा सञ्चालनका लागि ७ करोड रुपैयाँ विनियोजन गरिएको जानकारी दिइन् ।
