ललितपर ,३ असार
ललितपुर महानगरपालिकाले २०८१ असार भित्र मुख्य चोकहरुमा १२ वटा ‘हाइमास्ट लाइट’ र सडकहरूमा ‘स्मार्ट स्ट्रिट लाइट’ राख्ने तयारी गरेको छ ।
महानगरपालिकाले स्मार्ट लाइट जडानको कार्यक्रम आर्थिक वर्ष २०७८/७९ को बजेटमै राखेको भएपनि
सो आवमा जडान हुन नसकेको महानगरले जनाएको छ । महानगरका अनुसार सो वर्षको योजना बमोजिम चालु आर्थिक वर्षको असारसम्म १२ वटा चोकमा हाइमास्ट स्मार्ट बत्ती जडान गरिने छ ।
चालु आवमा कुपन्डोलस्थित बागमती पुल, पुल्चोक, लगनखेल चोक बसपार्क, बटुक भैरब मन्दिरअगाडि, बुङमती बसपार्क, शंखपार्क शंखमुल, ठाडोढुंगा चोक, धोबीघाट ढुंगेधारा, महालक्ष्मी स्थानमा रहेको महालक्ष्मी मन्दिरमा बत्ती जडान गर्न लागिएको हो । हालसम्म चारवटा चोकमा बत्ती जडान भइसकेको महानगरपालिकाले जनाएको छ ।
महानगरका अनुसार विद्युत प्राधिकरणसँगको सहकार्यमा हाइ मास्ट स्मार्ट सडक बत्ती जडान गरिने छ । महानगरपालिकाका पूर्वाधार महाशाखा प्रमुख वरिष्ठ इन्जिनियर श्रीकुमार महर्जनका अनुसार पुल्चोक क्याम्पस, पुल्चोकस्थित महानगरपालिकाको भवन अगाडि, जावलाखेल र लगनखेलमा यो बत्ती जडान भइसकेको छ ।
यसैबिच महानगर प्रमुख चिरीबाबु महर्जनले महानगरलाई उज्यालो बनाउने अभियानअन्तर्गत स्मार्ट सडक बत्ती जडान गरिएको बताउँदै १६ मिटर अग्लो पोलमा हाइ मास्ट स्मार्ट सडक बत्ती जडान गरिएको जानकारी दिए ।
ललितपुर महानगरपालिकाले पहिलो चरणमा चक्रपथ भित्र कोर सिटीमा ६ सय ६९ वटा स्मार्ट लाइट जडान गरिसकेको जनाएको छ । चक्रपथ बाहिर थप १ हजार ४ सय स्मार्ट स्ट्रिट लाइट राख्ने महानगरको भनाइ छ । स्मार्ट सडक बत्ती जडानका लागि प्राविधिक सहयोग तथा निरीक्षण नेपाल विद्युत प्राधिकरणले गरेको हो ।
यसको साथै महानगरले सडक बत्ती जडानको कार्यलाइ पनि तिब्रता दिएको छ । अहिलेसम्म बाग्मती पुलबाट जावलाखेल लगनखेल हुँदै सातदोबाटोसम्म, हिमालय होटेल, पाटनढोका, अशोक हल, क्वाल्खु हुँदै मंगलबजार, लगनखेलसम्म, पुल्चोक महानगरपालिका कार्यालयबाट मंगलबजार हुँदै ग्वार्कोसम्म सडकबत्ती जडान भइसकेका छन् ।
त्यस्तै महानगरले चक्रपथबाहिरका वडाहरु सुनाकोठी, बुङमती, खोकना, हरिसिद्धि, भैँसीपाटी, धापाखेलमा स्मार्ट सडकबत्ती जडान भएको जनाएको छ । एड्भोटेरिएल
