आधारभूमि संवाददाता
ललितपुर, माघ २८
भक्तपुरको सूर्य विनायक नगरपालिकामा कित्ताकाट रोकिए पनि खेती योग्य जग्गामा प्लटिङ्ग गर्ने क्रम सफ्तारमा बढेकोे पाइएको छ । सूर्यविनायक नगरपालिको नलिञ्चोकमा करीब ६ सय रोपनी जग्गामा प्लटिङ्ग गरेको देखिन्छ । सरकारले २०७९ जेठ २ गते भू–उपयोग नियमावली ल्याए पनि वडाहरु र नगरपालिकाको आफूखुसी मनपरी ढङ्गबाट निर्णय गरी भू–उपयोग नियमावलीको वास्ता नगरी खेती योग्य जग्गामा माटो सम्याउने, डोजर लगाउने जग्गा टुक्रा पार्ने काम गरिरहेको पाइएको छ ।
नगरपालिकाले २०७९/ १०/१९ मा सात बुँदे निर्णय गरेता पनि १ वर्ष अघि देखि खेती योग्य जग्गामा माटो सम्याउने, डोजर लगाउने जग्गा टुक्रा पार्दै आएको स्थानीय बताउँछन् । त्यस्तै अन्य वडाहरुमा पनि माटो सम्याउने, डोजर लगाउने, जग्गा टुक्रा पार्ने क्रम बढ्दै गएका छन् । यस विषयमा सूर्यविनायक नगरपालिका प्रमुख प्रशासकीय अधिकृत राजेन्द्र प्रसाद कँडेलका अनुसार यस विषयमा आफुलाई केही जानकारी नभएको वडा अध्यक्षहरु संग बुझ्न आग्रह गरे । केही वडा अध्यक्षहरुलाई टेलिफोन सम्पर्क गर्दा फोन उठाउन इन्कार गरेका छन् । वडा नं. ९ का वडा अध्यक्ष भगवान खत्रीका अनुसार जग्गा बर्गीकरण गरी वडा नगरस्तरीय निर्णय अनुसार ५ वर्ष पछि कित्ताकाट गर्ने सर्तमा प्लटिङ्ग गरिएको बताए ।
