आधारभूमि संवाददाता
काठमाडौँ, ३० वैशाख
स्थानीय तहको आज बिहान ७ बजेदेखि भैरहेको छ । मतदान कार्यक्रम साँझ ५ बजेसम्म जारी रहने छ । संघियता कार्याद्यनयन भएपछि यो देशको दोस्रो निर्वाचन हो । यस निर्वाचन पनि ३५ हजार २२१ (निर्विरोध निर्वाचित भएका ३५५ जना बाहेक) का पदमा प्रतिनिधि छनोट गर्नेछन् ।
निर्वाचन आयोगले आज हुने स्थानीय तह सदस्य निर्वाचन, २०७९ को सम्पूर्ण तयारी पूरा गरिसकेको छ । निर्वाचनलाई स्वच्छ, स्वतन्त्र, निष्पक्ष र भयमुक्त वातावरणमा सम्पन्न गराउन आयोगले आवश्यक तयारी गरेको आयोगले पत्रकार सम्मेलन गरी जानकारी दिएको छ ।
निर्वाचनमा विभिन्न राजनीतिक दलका ३५५ जना विभिन्न पदाधिकारी निर्विरोध निर्वाचित भइसकेका छन् भने छ वडाध्यक्षसहित ३५ जना स्वतन्त्र सदस्य निर्विरोध निर्वाचित भएका छन् ।
यो निर्वाचनमा १० हजार ७५६ मतदानस्थलका २१ हजार ९५५ मतदान केन्द्रमा एक करोड ७७ लाख ३३ हजार ७२३ मतदाता रेहेका छन् । मतदान केन्द्रमा आवश्यक हुने निर्वाचन सामग्रीसहित एक लाख नौ हजार ८८ जना कर्मचारी र ६५ हजार ८६५ जना स्वयंसेवक आआफ्नो मतदान केन्द्रमा पुगिसकेका छन् ।
स्थानीय तह निर्वाचनमा भाग लिने भनी दर्ता भएका ७९ वटा राजनीतिक दलमध्ये जम्मा ६५ वटा राजनीतिक दल चुनावी प्रतिस्पर्धामा रहेका छन् । पचपन्न हजार ६९८ जना महिला र ८९ हजार ३१३ जना पुरुष गरी विभिन्न राजनीतिक दल र स्वतन्त्र उम्मेदवारसमेत जम्मा एक लाख ४५ हजार ११ जना चुनावी प्रतिस्पर्धामा रहेका छन् ।
